×
  • Lajme
  • Lajme

    Ismaili reagon pas vendimit të sotëm të Zemajt për barnat: Kjo është fitore e rrjeteve kriminale

    FrontOnline
    05 Gusht 2020

    Ismaili reagon pas vendimit të sotëm të Zemajt për barnat: Kjo është fitore e rrjeteve kriminale

    Sekretari i Përgjithshëm i PDK-së, Uran Ismaili ka reaguar pas vendimit të Ministrit të Shëndetësisë, Armend Zemaj, për çmimin e barnave në Kosovë.

    Në një konferencë për media, Ismaili ka thënë se ky akt e rikthen krimin në shëndetësi, u shërben disa individëve dhe e varfëron popullin.

    “Anulimi një herë, e pezullimi tash, i Udhëzimit që rregullon dhe ulë çmimet e barnave, është fitore e interesave të grupeve kriminale që dëshirojnë të pasurohen në kurriz të shëndetit të qytetarëve. Është kthim prapa në shëndetësi, është varfërim i qytetarit dhe është pajtim që paratë e taksapagueseve të mos investohen, por të keqpërdoren”, ka thënë Ismaili.

    Ndryshe, Ministri i Shëndetësisë, Armend Zemaj pas presionit që iu bë ka anuluar vendimin që mori dje për shfuqizimin e Udhëzimit Administrativ për rregullimin e çmimit të produkteve dhe pajisjeve medicinale.

    Lajmin e ka bërë të ditur Ministria e Shëndetësisë, përmes një njoftimi në faqen zyrtare.

    Ky vendim i Zemajt vjen pas takimit që ka pasur me përfaqësues të Odës së Farmacistëve të Kosovës, të Shoqatës Farmaceutike të Kosovës, të Shoqatës së Distributorëve Farmaceutikë të Kosovës dhe zyrtarë të tjera nga komuniteti farmaceutik

    “Pas këtij takimi, Ministri Zemaj ka anuluar vendimin e datës 04. 08. 2020, me të cilin është shfuqizuar Udhëzimi Administrativ 02/2019 për rregullimin e çmimit të produkteve dhe pajisjeve medicinale dhe ka nxjerr vendim me të cilin ka obliguar Sekretarin e Përgjithshëm të MSh-së që të ndërmarr veprime për plotësim – ndryshimin e Udhëzimit Administrativ 02/2019 për rregullimin e çmimit të produkteve dhe pajisjeve medicinale”, thuhet në njoftim./Gazeta Express

    Deklarata e plotë e Ismailit:

    Sot jam këtu, që me shqetësim të madh, ta ngre zërin për një temë që është e të gjithëve, pa marrë parasysh bindjet politike.

    Jam këtu për një çështje tronditëse – që duhet të na mobilizojë të gjithëve.

    Ministri Armend Zemaj dje i ka dhënë hapësirë krimit dhe korrupsionit në shëndetësi, duke e shfuqizuar Udhëzimin Administrativ për rregullimin dhe unifikimin e çmimit të barnave.

    Me këtë vendim, ai ka goditur një nga reformat më të mëdha në historinë e shëndetësisë dhe ka ri-legalizuar krimin.

    Pas presionit publik, Zemaj ka shfuqizuar sot vendimin e djeshëm të tij, duke krijuar një ekip të ri për ta ndryshuar këtë Udhëzim, i cili ishte hartuar me ekspertë ndërkombëtarë dhe nën mbikëqyrjen e Organizatës Botërore të Shëndetësisë.

    Krijimi i një ekipi të ri është vetëm një blerje kohe, e cila do të mund të shfrytëzohet nga kompanitë për abuzim me çmimet e barnave.

    Ky manipulim do t’u kushtojë qytetarëve tanë, të cilët do të vazhdojnë të blejnë barna me çmime më të shtrenjta se qytetarët e shteteve përreth.

    Anulimi një herë, e pezullimi tash, i Udhëzimit që rregullon dhe ulë çmimet e barnave, është fitore e interesave të grupeve kriminale që dëshirojnë të pasurohen në kurriz të shëndetit të qytetarëve.

    Është kthim prapa në shëndetësi, është varfërim i qytetarit dhe është pajtim që paratë e taksapagueseve të mos investohen, por të keqpërdoren.

    Një ndër pengesat më të mëdha të zhvillimit të shëndetësisë ka qenë korrupsioni masiv në blerjen e barnave, që i ka pasuruar disa, por e ka varfëruar popullin.

    Për 20 vjet me radhë, Kosova ka blerë mbi 6 milionë euro më shtrenjtë barna spitalore brenda vitit, ndërsa qytetarët janë dëmtuar financiarisht duke shpenzuar nëpër barnatore rreth 10 milionë euro më shumë për barna në vit.

    Për kohë të gjatë, paraja publike është keq-shfrytëzuar. Barnat që kanë mundur të blihen me 3 euro, janë blerë me 30 euro.

    Për kohë të gjatë, miliona euro u janë dhënë kompanive, të cilat nuk kanë pasur për qëllim ofrimin e produkteve më cilësore me çmime më të lira, por pasurimin brenda natës dhe marrjen e kontratave milionëshe.

    Ky rrjet kriminal ka qenë dhe mbetet ende rrezik i sektorit të shëndetësisë dhe plaçkitës i parasë publike.

    Nëse paratë e taksave tona nuk shkojnë në investimin dhe përmirësimin e sektorit të shëndetësisë, por në xhepat e individëve dhe kompanive të caktuara, atëherë jemi të dënuar të kemi shëndetësinë më të dobët, e rrjetin kriminal më të fortë.

    Nëse nuk i ndalet rruga korrupsionit, nuk do të ketë shëndetësi të zhvilluar, shërbime më të mira profesionale, aparatura të reja dhe barna të mjaftueshme nëpër spitale.

    Kjo ishte bindja ime sa isha Ministër i Shëndetësisë dhe mbi këtë vizion kam zhvilluar për dy vjet një betejë shumë të vështirë për ta nënshkruar Udhëzimin Administrativ që i rregullon dhe ulë çmimet e barnave.

    Kam punuar pa u ndalur, bashkë me Organizatën Botërore të Shëndetësisë, për ta krijuar bazën ligjore që qytetarët tanë të mos paguajnë çmime shumëfish më të larta për barnat e njëjta.

    Për 20 vjet, qytetarët tanë kanë blerë barna më të shtrenjta në barnatoret e Kosovës sesa qytetarët në Maqedoni dhe në Shqipëri.

    Për 20 vjet, qytetarët tanë kanë blerë barna paradite me një çmim tjetër, e në mbrëmje – kur kanë qenë në hall – me një çmim tjetër.

    Me një çmim tjetër në fshat, me një çmim tjetër në qytet.

    Me çmime të ndryshme në lagje të ndryshme.

    Udhëzimi Administrativ, të cilin unë e kam nënshkruar në vitin 2019, e të cilin Ministri Zemaj e anuloi dje dhe e pezulloi sot për blerje kohe, ndalonte abuzimin me çmimet e barnave – duke ndaluar këdo që ofertonte çmime më të larta se në treg dhe vendoste rregullin për t’i ulur dhe nivelizuar çmimet nëpër të gjitha barnatoret e Kosovës.

    Para se ta nënshkruaja këtë Udhëzimin, Kosova dhe Bjellorusia ishin vendet e vetme në Evropë që nuk i kishin të rregulluara çmimet e barnave.

    Pra, ishim pikë e zezë në hartën e Evropës.

    Ky Udhëzim ishte në kundërshtim me interesin e një pakice, por në interes të shumicës.

    Ky Udhëzim që ndihmoi në ndaljen e korrupsionit në Ministrinë e Shëndetësisë, ka ruajtur xhepin e qytetarëve dhe ka kthyer dinjitetin e farmacistëve tanë.

    Prandaj, sjellja e Ministrit Zemaj ndaj këtij Udhëzimi është një fitore e rrjeteve kriminale dhe e grupeve të interesit.

    Kërkoj nga Qeveria që urgjentisht ta jetësojë Udhëzimin Administrativ, të nënshkruar në vitin 2019, e të mos lejohet të shfrytëzohet pandemia për t’i dhënë krahë krimit.

    Është për t’u përshëndetur reagimi i qytetarëve dhe mediave, organizatave joqeveritare dhe odave profesionale.

    Është në interesin e qytetarëve që ky reagim të vazhdojë deri në reflektimin e Ministrit Zemaj për të mos lejuar varfërimin e qytetarëve duke blerë barna me çmime shumëfish më të shtrenjta.

    https://www.facebook.com/FrontOnlineMedia/videos/422852518672241/

    Nga Rubrika
    Lajme09 Shkurt 2025
    Asamblisti i Lëvizjes Vetëvendosje në Podujevë, Artrit Mulliqi ka shkelur heshtjen zgjedhore e cila duhet të mbizotërojë gjatë kohës kur qytetarët votojnë....
    Lajme09 Shkurt 2025
    Radhë të gjata të qytetarëve shfrytëzuan të drejten e tyre për të votuar, në Trudë të kryeqytetit. Sylejman Jakupi kryesues i një...
    Lajme09 Shkurt 2025
    Si ka qenë trendi i fletëvotimeve të dëmtuara ndër vite? Me ose pa qëllim, shumë fletëvotime edhe dëmtohen gjatë procesit të votimit,...
    Të tjera
    Lajme09 Shkurt 2025
    Rezultatet prelimintare të zgjedhjeve të sotme parlamentare në Kosovë do të dihen “shumë më shpejt”, për dallim prej herave të kaluara, tha...
    Bota/Rajoni09 Shkurt 2025
    Një helikopter u rrëzua në një pyll në Gjermani. Sipas policisë, dy persona kanë mbetur të vdekur, sipas BILD. Siç bëhet e...
    Lajme09 Shkurt 2025
    Kosova sot po voton për zgjedhjet parlamentare. Në orën 07:00 janë hapur qendrat e votimit dhe do të mbyllen në orën 19:00....
    Lajme09 Shkurt 2025
    Një situatë e rrallë ka ndodhur në Malishevë gjatë procesit të votimit. 26 anëtarë të një familje kanë shkuar të votojnë së...
    Zgjedhjet 202509 Shkurt 2025
    Dalja më e madhe në votime në përqindje po ndodhë në komunat me shumicë serbe. Sipas KQZ, dalja më e madhe deri...
    Lajme09 Shkurt 2025
    Komuna e Podujevës deri tani kanë votuar mbi 33%. Sipas të dhënave të Komisionit Zgjedhor të Kosovës nga 84 mijë e 23...

    FrontOnline, © 2025 Të gjitha të drejtat e rezervuara.