Komisioni e dha dritën jeshile para dy vjetëve. Tani edhe  Parlamenti Evropian i thotë po liberalizimit të vizave.

Por, përgjigjet pozitive të këtyre institucioneve të BE-së nuk kanë mjaftuar. Kosovarët, akoma, nuk po mund të udhëtojnë lirshëm pa viza.

Kjo, meqë Këshilli Evropian, institucion ky që e ka fjalën e fundit për këtë proces, nuk e ka dhënë ende aminin e tij.

E se kur pritet të ndodhë diçka e tillë nuk e dinë brenda këtij mekanizmi.

Në një përgjigje ekskluzive, nga zyra e Këshillit i thanë Front Online se diskutimet për heqjen e regjimit të vizave për kosovarët vazhdojnë të mbesin akoma në nivelin teknik.

“Diskutimet për liberalizimin e vizave për Kosovën kanë mbetur në nivelin teknik brenda Këshillit. Nuk mund të spekuloj se kur mund të sillet në nivelin ministror ose kur mund të merret një vendim”, thuhet në përgjigjen e tyre për Front Online.

Në nivelin teknik hisja kryesore e punës u takon grupeve punuese të BE-së.

Ato merren me shqyrtimin e përmbushjes së kritereve të një procesi dhe vendosin pastaj nëse i njëjti proces duhet të procedohet tutje apo jo për votim në nivelin Ministror.

Arsyet se pse një kalim i këtillë prej një procedure në tjetrën nuk ka ndodhur me procesin e liberalizimit të vizave për Kosovën, sipas njohësve të zhvillimeve, janë të shumta.

Pos pandemisë, profesori Dashnim Ismajli, liston edhe disa shkaqe të tjera që kanë çuar në shtyrjen e këtij procesi 10 vjeçar të Kosovës.

“Neglizhimi i procesit te liberalizimit te vizave për Kosovën nga BE ndërlidhet edhe me dialogun Kosove-Serbi. Pretekst mund të jenë edhe flukset e refugjateve nga Kosova. Në akseptin e brendshëm Kosova shihet ende si vend transit i krimit te organizuar”, tha ai për Front Online.

Këshilli i Evropës përbëhet prej 47 shteteve. Secili shtet përfaqësohet nga Presidenti.

Për të kaluar një akt ligjor ose për t`u marrë ndonjë vendim në Këshillë nevojitet që:

– 55% të shteteve anëtare të Këshillit të votojnë për dhe që 65% e tyre të përbëjnë popullsinë e përgjithshme të BE-së