Ministria e Infrastrukturës është duke pritur një vlerësim nga Instituti Kombëtar i Shëndetit Publik të Kosovës (IKShPK) se kur mund të nisin fluturimet e rregullta në Aeroportin Ndërkombëtar të Prishtinës “Adem Jashari”.
Në një përgjigje për Gazetën Insajderi, nga ministria e Infrastrukturës kanë thënë se ky vlerësim është duke u bërë në bashkëpunim me institucionet përgjegjëse.
“Ministria e Infrastrukturës në bashkëpunim me institucionet tjera përgjegjëse janë duke bërë vlerësimet dhe përgatitjet e duhura për hapjen e Aeroportit Ndërkombëtar të Prishtinës për fluturime ajrore, duke u siguruar që të gjitha rekomandimet e dala nga protokolli ndërkombëtar i sigurisë për mbrojtjen e shëndetit në aviacion do të zbatohen”, ka thënë për Insajderin, Fillojetë Konjuhi, zyrtare për media nga ministria.
Po ashtu Konjuhi ka bërë të ditur se që në momentin kur IKShPK dhe Ministria e Shëndetësisë do të japin një rekomandim pozitiv për nisjen e fluturimeve atëherë puna në aeroport do të fillojë.
“Pritet vlerësimi nga Instituti Kombëtar i Shëndetit Publik në lidhje me situatën aktuale shëndetësore me COVID-19 dhe në momentin e një rekomandimi pozitiv nga ky institut, Ministria e Shëndetësisë në koordinim me Ministrinë e Infrastrukturës do t’i propozojnë për vendimmarrje Qeverisë hapjen e Aeroportit Ndërkombëtar të Prishtinës për fluturime të rregullta”, ka thënë Konjuhi.
Tutje ajo ka shtuar se “Normalizimi i trafikut ajror, është një proces qe varet nga procesi i vlerësimit i IKSHP për COVID-19, nëse COVID-19 zvogëlohet në përhapje edhe transporti ajror fillon të normalizohet”.
Në Kosovë janë rritur numri i rasteve me koronavirus. Aktualisht numri i rasteve aktive në të gjithë vendin është 909 raste, të infektuar janë 1916, të shëruar 973 ndërsa kanë ndërruar jetë 34 persona.
Ndërsa sot Instituti Kombëtar i Shëndetësisë Publike ka reaguar edhe njëherë lidhur me shtimin e rasteve të të infektuarve me koronavirus.
Përmes, një reagimi në Facebook, IKSHPK-ja, ka thënë se bartja e maskave është obligative.
“Si pasojë e mos bartjes së maskave nga ju, qytetarë të nderuar, po rrezikohet shëndeti i juaj dhe i qytetarëve të tjerë dhe po rëndohet situata e përgjithshme epidemiologjike që po mbahet nën kontroll me mund të madh të ekipeve të profesionistëve të Institutit Kombëtar”, thuhet në njoftimin e institutit.
