Komuna e Malishevës është ndër komunat më të prekura me Coronavirus në Kosovë, deri më tani numri i të prekurve me Covid-19 ka shkuar në 70, raporton Front Online.
Por, nga kjo komunë ka 7 ditë që nuk ka asnjë të prekur nga Coronavirusi.
Kështu ka bërë të ditur kryetari i kësaj komune, Ragip Begaj.
“Në Malishevë qe shtatë ditë nuk ka asnjë rast me Coronavirus, ndërsa sot priten të testohen edhe 19 persona të tjerë, në mbrëmje dalin analizat e tyre nga Instituti Kombëtar i Shëndetësisë Publike”, tha ai për Front Online.
Begaj tha se në këtë komunë janë shëruar 36 persona të cilët kanë qenë të preku me Coronavirus.
“Në Malishevë deri më tani janë shëruar 36 persona me Coronavirus, ndërsa 34 janë ende të prekur, gjendja e të prekurve me këtë virus momentalisht është stabile”, potencoi Begaj për Front Online.
Begaj tha se janë në kontakt me familjet e të prekurve me coronavirus dhe se komuna po iu dërgon edhe ndihma.
“Jemi në kontakt çdo ditë me familjet e të prekurve me Coronavirus në Malishevë, komuna iu ka dërguar disa ndihma këtyre familjeve, por edhe familjeve që janë në asistencë sociale”, tha ai për Front Online.
Ndërkaq, në Kosovë deri më tani kanë vdekur 19 persona nga Coronavirusi, 630 janë të prekur dhe 138 të shëruar. /Front Online/
