Presidenti i Serbisë, Aleksandar Vuçiq ka njoftuar se të hënën e 31 gushtit do të zhvillojë një bisedë telefonike me kancelaren gjermane Angela Merkel. Dyshja pritet të diskutojnë për Kosovën dhe vizitat e ardhshme në Uashington dhe Bruksel.
”Nesër në mesditë kam një bisedë telefonike të planifikuar me Angela Merkel. Kosova do të jetë tema kryesore, si dhe vizita në Uashington dhe Bruksel”, citohet të ketë thënë Vuçiq, transmeton KlanKosova.
Siç shkruajnë mediat serbe, Vuçiq gjithashtu ka pohuar se do të diskutonte çështje të ndryshme me gruan më të fuqishme, përfshirë vaksinën për koronavirus, bashkëpunimin dypalësh mes Serbisë dhe Gjermanisë.
Po ashtu ai kujtoi se nesër do të ketë edhe një takim me Mirosllav Lajçak dhe se tema e bisedës me të do të jetë qëndrimi i tij në Washington.
Ky është takimi i dytë i thirrur nga Uashingtoni. Një takim i planifikuar më 27 qershor, ishte anuluar pak ditë para mbajtjes, meqë Zyra e Prokurorit të Specializuar me seli në Hagë kishte deklaruar se ka paraqitur një aktakuzë për krime lufte ndaj presidentit të Kosovës, Hashim Thaçi, i cili ishte i ftuar në takimin e Uashingtonit.
Dialogu ndërmjet Kosovës dhe Serbisë rinisi në Bruksel më 16 korrik, 20 muaj pasi ishte ndërprerë.
Në fund të vitit 2018, u ndërprenë bisedimet ndërmjet Prishtinës dhe Beogradit, me ndërmjetësimin e Brukselit, pasi autoritetet në Prishtinë, vendosën një taksë kundër importeve nga Serbia.
Taksa më pas u zëvendësua me reciprocitet. Por, qeveria e udhëhequr nga Avdullah Hoti e hoqi atë, duke thënë se po i jepet shans rinisjes së dialogut.
