U është caktuar nga një muaj paraburgim katër personave të dyshuar për gjuajtje me armë zjarri në bjeshkën e Istogut, bën të ditur Gjykata Themelore në Pejë përmes një komunikate për media.
“Gjykata Themelore në Pejë – Departamenti për Krime të Rënda, ka aprovuar kërkesën e Prokurorisë Themelore në Pejë për caktimin e masës së paraburgimit ndaj të pandehurve R.K, P.M, M.U dhe G.M,”, thuhet në njoftim.
Gjykata njofton se më parë e gjer me datë 15.08.2020, në mënyrë të paautorizuar dhe në kundërshtim me ligjin kanë mbajtur në pronësi dhe kontroll të paautorizuar armë nga të cilat me datë 15.08.2020, rreth orës 17:00, gjersa ishin së bashku në Bjeshkët e Istogut, kanë shkrepur disa herë në ajër duke shkaktuar frikësim dhe shqetësim te banorët e asaj ane, e të cilat armë pastaj i sekuestron policia.
Po gjuanin me armë në bjeshkë, arrestohen katër persona në Istog
Me këto veprime të pandehurit dyshohet se kanë kryer veprën penale përdorim i paautorizuar i mjetit të rrezikshëm apo armës.
“Të pandehurve R.K, P.M, M.U dhe G.M iu është caktuar masa e paraburgimit në kohëzgjatje prej një (1) muaji. Kundër këtij vendimi pala e pakënaqur ka të drejtë ankese në Gjykatën e Apelit”, thuhet në njoftim.
