Ministri i Shëndetësisë, Armend Zemaj, ka thënë se në ditën e parë të nisjes së vitit të ri shkollor janë raportuar vetëm 50 raste të reja me virusin korona, duke shtuar se është punuar në këtë drejtim për të ulur lakoren e infektimeve në muajin shtator.
Me rastin e nisjes së vitit të ri shkollor, Zemaj ka vizituar disa shkolla, ndërsa ka shprehur keqardhje në disa disa shkolla ku s’janë respektuar masat anti-covid.“Dje, isha për vizitë në dy shkolla në komunën e Prishtinës dhe të Vushtrrisë, për të parë përgatitjet për mësim.
Por, është për keqardhje pamjet e publikuara nga disa shkolla tjera për neglizhencën e masave nga disa prindër dhe arsimtarë, të grumbulluar para dyerve të shkollave, pa maskat mbrojtëse! Lus prindërit dhe personelin arsimor të tregohen të përgjegjshëm dhe me përpikëri të vazhdojnë t’i respektojnë masat”, ka shkruar ai.
“Çdo neglizhencë e rekomandimeve anti covid, rrezikon shëndetin e përgjithshëm dhe nuk do të tolerohet. Ne, do të vazhdojmë angazhimin që të respektohen masat anti covid dhe të ruhet shëndeti i fëmijëve dhe nxënësve”, ka thënë tutje Zemaj në një postim në Facebook.
