Sot me fillim nga ora 10 do të nisë intervistimi nga Këshilli Drejtues i UP-së, për tre kandidatët që synojnë postin e Rektorit të Universitetit të Prishtinës “Hasan Prishtina”,për një mandat katër vjeçar.
Bëhet fjalë për Naser Sahiti, Faton Berisha dhe Blerim Rexha.
Çfarë pune paraprakisht ka bërë secili prej tyre, çfarë pozite kanë mbajtur para se të synojnë për të parin e UP-së?
Naser Sahiti, ish prorektor për mësimdhënie dhe çështje të studentëve në Universitetin e Prishtinës, por kishte dhënë dorëheqje nga pozita e prorektorit në vitin 2018 për shkak të mospajtimeve me rektorin Marjan Dema.
Sahiti aktualisht është profesor i rregullt në Fakultetin e Inxhinerisë Mekanike dhe ligjëron në Departamentin e Termoenergjetikës dhe Energjisë së Ripërtrishme.
Ndërsa Faton Berisha është kandidati tjetër në mesin e dy të tjerëve që synon të bëhet Rektor i UP-së.
Berisha aktualisht ka pozitën e prorektorit për kërkime shkencore dhe është profesor i rregullt në Fakultetin e Shkencave Matematiko-Natyrore në departamentin e Matematikës.
Berisha për disa vite ka qenë udhëheqës i Kosovës në olimpiadat ndërkombëtare të matematikës si dhe viti 2012 deri në vitin 2016 ka qenë anëtar i Këshillit Qendror të Studimeve Shkencore.
E kandidati tjetër që përmbyll listën e 3 personave që janë përzgjedhur nga komisioni për në garën e ngusht për Rektor të UP-së, është Blerim Rexha.
Ai ka qenë drejtor i Bordit të Agjencisë së Kosovës për Akreditim, i zgjedhur në vitin 2015, ndërsa paraprakisht kishte mbajtur pozitën e Kryetarit të Bordit të Agjencisë Kosovare të Privatizimit,si dhe më parë ishte pjesë e strukturave të PDK-së.
Ndryshe Universiteti i Prishtinës, “Hasan Prishtina” ka hapur konkursin për rektor të këtij Universiteti më 10 korrik dhe ishte mbyllur më 24 korrik, shkruan Indeksonline.
