Pas bllokimit të llogarive të Telekomit të Kosovës, sot punëtorët e kësaj ndërmarrje kanë protestuar para Qeverisë dhe Kuvendit të Kosovës, raporton Front Online.

Rreth 3500, punëtorë të kësaj ndërmarrjeje rrezikojnë të mbesin pa paga dhe pa punë në rast se Qeveria e Kosovës, nuk e gjen një zgjidhje për Telekomin.

Kryeministri i Kosovës, Avdullah Hoti i ka takuar kryetarët e sindikatave të punëtoreve të kësaj ndërmarrje.

Lidhur me takimin që kanë pasur me kryeministrin për Front Online, ka folur Muhamet Xhemajli, kryetar i Sindikatës Profesionale të PTK-së.

Ai tha se Kryeministrit Hoti u ka premtuar se deri në fund të javës së ardhshme do të gjendet një zgjidhje për Telekomin dhe se nuk do të lejojnë falimentimin e kësaj ndërmarrje.

“Kërkesa e Kryeministrit ka qenë me ndërpre grevën pasi që na ka premtuar zgjidhje të shpejt për Telekomin dhe nga mesi i javës së tjetër do të informohemi saktësisht, detaje nuk na ka dhanë, por na ka premtuar se askush nuk do të jetë pa pagë dhe pa punë, nuk do të lejojmë me falimentu Telekomi. Kërkesa jonë ka qenë me marrë detaje por nuk kemi marrë, ne kemi marrë zotimi nga Kryeministri se problematika e Telekomit do të zgjidhet deri në fund të javës së tjetër”, tha ai për Front Online.

Xhemajli tha se Kryeministri Hoti ka kërkuar që të ndalet greva e punëtorëve dhe të vazhdohet me punë, pasi që siç tha ai, Kryeministri ka thënë se me emërimin e Bordit të ri të kësaj ndërmarrjeje do të gjendet zgjidhja.

“Të dy sindikatat kemi vendosë me ndalë grevën deri nga mesi i javës tjetër, pasi që jemi informuar se javën e ardhshme do të emërohet edhe Bordi i ri, pasi që me ardhjen ne këtij Bordi, Kryeministri na ka premtuar edhe zgjidhje”, tha ai.

Kryesindikalisti për Front Online tha se në rast se nuk do të ketë zgjidhje të problemit në ndërmarrjen e Telekomit të Kosovës, do të ketë greva dhe protesta më radikale.

“Në rast se nuk do të ketë zgjedhje do të shkojmë me hapa edhe më radikal të grevës dhe protestës”, u shpreh Xhemajlaj./Front Online/