Policia italiane ka vënë në pranga një shqiptar pasi akuzohet për trafik droge. Guardia di Finanza e Varese-s arriti të sekuestronte sasinë e madhë të drogës që posedonte i riu.

U bë i mundur sekuestrimi i mbi 53 kg marijuanë dhe arrestimi i një shtetasi shqiptar në shtëpinë e tij në Malnate në zonën e Lombardisë, i akuzuar për përfshirje në trafikim të lëndëve narkotike.

Nga informacionet dhe hetimet paraprake, efektivët e policisë kanë bërë të mundur identifikimin në vendbanimin e shtetasit shqiptar si dhe vendin e mundshëm të depozitimit të substancës së paligjshme, e cila tregtohej tek të rinjtë që frekuentonin klubet e natës.

Shqiptari kishte më shumë se 53 kilogramë marijuanë të depozituar në bodrum, brenda 7 kutive të fshehura mirë dhe vlera e mallit kapte shumën e rreth 400 mijë eurove.