Kryetari i Partisë Demokratike të Kosovës (PDK), Kadri Veseli ka zgjedhur që vikendin ta kalojë duke ia kushtuar djalit të tij.

Veseli ka njoftuar se sot ka zbarkuar në fushën e Matiqanit për të zhvilluar një ndeshje futbolli, e së bashku me lojën, i pari i PDK-së thotë se djalit të tij i ka treguar edhe ngjarje gjatë luftës në Kosovë.

Përmes një postimi në llogarinë e tij në Facebook, Veseli ka shkruar se fusha ku ka zgjedhur të luaj gjatë kohës së luftës është shfrytëzuar si improvizim për t’i zhvilluar ndeshjet e kampionatet e Kosovës.

“Dola për të luajtur futboll me djalin tim Yllorin në fushën e Matiqanit. I tregova se gjatë kohës së okupimit, ndeshjet e futbollit dhe kampionatet e Kosovës, janë zhvilluar në fusha të improvizuara si kjo e Matiqanit apo ajo e Llukarit. Kjo fushë e thjeshtë është gjithashtu dëshmi e potencialit të madh të sportistëve kosovarë të cilët e kanë nisur në kushte minimale, dhe sot luajnë në ekipet dhe stadiumet më prestigjioze të botës”, ka shkruar Veseli.

Po ashtu Veseli ka kërkuar nga institucionet e vendit që të tregojnë kujdes të veçantë për sportistët gjatë kohës së pandemisë.

“Ne, duhet të shprehim mirënjohje për të gjithë ata që me kontributin e përpjekjet e tyre, kanë mundësuar mbajtjen gjallë të jetës sportive. Sot, institucionet shtetërore duhet të tregojnë kujdes të veçantë për sportistët, ekipet dhe infrastrukturën sportive që janë prekur shumë gjatë pandemisë”, ka shkruar ndër tjera Veseli.