Tre persona kanë vdekur në qytetin Bangalore të Indisë pasi policia i qëlloi me armë protestuesit që po protestonin kundër një postimi në Facebook, të cilin ata e konsiderojnë fyerje ndaj profetit Muhamed.

Protestuesit u mblodhën para shtëpisë së një politikani lokal, i afërmi i të cilit u akuzua për një postim fyes ndaj profetit Muhamed, shkruan BBC, transmeton Gazeta Express.

Ata ua vunë flakën veturave dhe i sulmuan me gurë policët që shkuan në vendin e ngjarjes.
Policia e ka arrestuar burrin dhe 110 persona të tjerë që ndodheshin në mesin e protestuesve.

Komisioneri lokal, Kamal Pant, tha se së paku 60 policë u lënduan gjatë dhunës që shpërtheu të martën në mbrëmje.

Vdekja e tre personave u konfirmua edhe nga ministri rajonal i Punëve të Brendshme të Karnatakas.

Mediet lokale raportuan se postimi për të cilin u organizua protesta tashmë është fshirë nga rrjeti social.