Spanja, një nga vendet më të prekura nga koronavirusi në të gjithë botën, raportoi sot për një numër më të madh të shëruarish sesa të infektuarish.
Sipas Ministrisë së Shëndetësisë kjo u regjistrua për të dytën ditë radhazi.
Zyrtarët thanë se gjatë 24 orëve të fundit ishin shëruar më shumë se 3 500 të sëmurë me COVID-19, ndërsa u regjistruan 3 000 raste të reja. Në të njejtën periudhë kohore u raportuan 378 viktima.
Shifrat e fundit e rritën numrin e përgjithshëm të të infektuarve në më shumë se 220 000 dhe janë regjistruar rreth 23 000 viktima. Më shumë se 95 000 persona janë shëruar.
