Deputetja e Kuvendit të Kosovës nga lëvizja Vetëvendosje, Fitore Pacolli, është deklaruar për media lidhur me seancën për votimin e qeverisë “Hoti”, raporton Front Online.

Ajo ka thënë që qeveria “Hoti” ndryshe nga ajo “Kurti”, do të jetë e varur nga Lista Serbe dhe nga Beogradi.

“Është qeveria e vetme që ishte qeveri që nuk varej nga Lista Serbe dhe që u rrëzua, teksa nëse sot votohet ndonjë qeveri është e varuar nga Lista Serbe. Kjo përpjekje është kundër vullnetit të popullit dhe rrjedhimisht”, ka thënë Pacolli.

Në këtë deklarim për media deputetja e VV-së, e ka “goditur”, presidentin e vendit, Hashim Thaçi. Ajo ka thënë që Thaçi është duke e dërguar vendin drejt një shteti autoritar, raporton Front Online.

“Kosova është duke shkuar drejt një vendi autoritar nën udhëheqjen e Thacit”, ka thënë ajo.

Për sa i përket mospjesëmarrjes në seancën ku do të votohet qeveria e re, Pacolli ka thënë që nuk do të marrin pjesë në një qeveri ilegale.

“Ne sot nuk kemi shkuar në Kuvend sepse nuk duam të jemi prezentë gjatë formimit të një qeverie ilegale. Ne do ta kundërshtojmë këtë qeveri sepse nuk e përfaqëson popullin dhe demokracinë”, ka thënë tutje Pacolli.

Lëvizja Vetëvendosje këtyre ditëve ka filluar mbledhjen e nënshkrimeve të qytetarëve, për peticionin ku po kërkohen zgjedhje të reja. Lidhur me këtë çështje, Pacolli ka theksuar se kanë për qëllim, dërgimin e tyre edhe në BE, raporton tutje Front Online

“Ne po mbledhim nënshkrime dhe ky është hapi i parë i kundërshtimit. Ne kemi dal në sheshe dhe në lagje për të mbledhur ato. Këto nënshkrime do t`i adresojmë kudo që mundemi si në institucionet e Kosovës, ashtu edhe në institucione ndërkombëtare si në Bashkimin Evropian”, ka thënë ajo.

Pacolli nuk e ka përjashtuar edhe mundësinë e fillimit të protestave në vend.

“Do të kemi opsion edhe protestat, por për çdo veprim do të njoftoheni me kohë”, ka thënë deputetja e VV-së. /Front Online