70 mostra të reja janë marrë sot në Komunën e Gjilanit për testim për virusin Covid-19, raporton Front Online.

Kjo pasi që të njëjtit kanë pasur kontakt me 9 personat nga kjo komunë, që rezultuan mbrëmë me Coronavirus, raporton Front Online.

Nënkryetari i Komunës së Gjilanit, Arbër Ismajli ka thënë për “Front Online”, se rastet e reja në këtë komunë kanë ardhur si pasojë e kontaktit me një person të infektuar në një klinikë private në Prishtinë. E si pasojë e këtyre rasteve është mbyllur edhe Spitali i Pediatrisë në këtë komunë.

“Para dy ditësh ka qenë një rast pozitiv e cila është një rast i kontaktit me një të infektuar në spitalin privat në Prishtinë ‘Sirona’ dhe pastaj kanë dal që familjarët e saj janë infektuar. Ka qenë nëna e saj e cila është infermiere në Spitalin e Pediatrisë e cila është infektuar me Coronavirus dhe ka prekur edhe disa kolegë të saj”, tha ai për Front Online.

E nga e njëjta, Coronavirusin e kanë marrë edhe një doktor dhe 4 motra medicinale në Spitalin e Pediatrisë në këtë komunë.

“Me Coronavirus nga Spitali i Pediatrisë në Gjilan është një doktor dhe 3-4 motra medicinale që janë pjesë e pediatrisë. Kjo ka qenë njëra ndër arsyet që është mbyllur Pediatria. Janë anuluar shërbimet përkohësisht deri në finalizimin e mostrave që pritet të merren sot e që numri i tyre besoj që e kalon 70 sipas informacioneve që na kanë ardhur së fundmi”, ka konfirmuar Ismajli për Front Online.

Gjendja shëndetësore, sipas Ismajlit, është e mirë dhe tani sipas tij në Gjilan janë vetëm 12 raste aktive me këtë virus.

“Gjendja e tyre shëndetësore është e mirë. Nga mëngjesi i kemi vizituar të gjitha këto familje që janë të prekura. Përveç ndonjë simptome shumë të vogël, gjendja e tyre në përgjithësi është e mirë dhe është stabile. Të gjithë janë në vet izolim në shtëpitë e tyre.   Në Gjilan i kemi gjithsej 12 raste aktive me Covid-19”, ka thënë ai.

Në ndërkohë në Kosovë deri më tani janë shënuar 884, teksa prej tyre 655 janë shëruar dhe 28 persona kanë vdekur në total. /Front Online/