Personat të cilët hyjnë në Mal të Zi nga Serbia do të futen në karantinë, kështu vendosi mbrëmë Trupi Koordinues Kombëtar i Malit të Zi për Sëmundjet Infektive (TKK).

Ky trup ka prezantuar disa masa epidemiologjike për të gjithë Malin e Zi, veçanërisht për rajonin verior.

“Për shkak të zhvillimit të situatës epidemiologjike në Republikën e Serbisë, është vendosur që të gjithë personat që hyjnë në Mal të Zi nga ai vend të dërgohen në karantinë”, kumtoi qeveria malazeze.

Në kumtesë shtohet se “shkalla e rasteve aktive në Republikën e Serbisë, veçanërisht në zonën përgjatë kufirit me Malin e Zi, kërkon mbikëqyrje të rreptë epidemiologjike”.

“Prandaj, personat që hyjnë në Mal të Zi nga Republika e Serbisë nuk do të dërgohen në vetizolim shtëpiak deri në njoftimin e mëtejshëm, por vetëm në karantinë në objektet e përcaktuara nga shteti”.

TKK ka vendosur që kopshtet në Mal të Zi të mbyllen përsëri, ndërsa objektet hotelierike do të jenë të hapura deri në mesnatë.