Familjarja e një prej të infektuarve me COVID-19 në Kosovë ka thënë se pas pesë dite, institucionet u kanë bërë atyre testimet se a janë të prekur me Covid-19.
Ajo thotë se pavarësisht se familjari kishte shenja shumë të mëdha të COVID-19, institucionet u vonuan pesë ditë, që sipas saj kjo ndikoi që edhe familjarë të tjerë të infektohen.
“Familjari ynë kishte disa ankesa por nuk ishin shenja të coronavirusit. Ka vazhdua terapinë në QMF duke marrë edhe antibiotik. Ka pasur kryesisht dhimbje të shpinës. Pas pesë ditësh kur ka filluar terapinë, kanë filluar shenjat me të theksuara si ethe, temperaturë e madhe dhe pak si humbje e vetëdijes”, tregon një qytetare për emision Radar në RTV Dukagjini.
Kjo qytetare e cila ka dashur të mbetet anonime, ka shtuar se familjarët e tjerë të cilët dolën pozitiv me COVID-19, pritën pesë ditë për t’u testuar.
“Kemi thirrur në Institut për të ardhur e t’i bëjnë testet pasi në familje është shtuar frika. Na kanë thënë janë 5,000 veta në pritje dhe ne duhet të presim. Kemi pritur pesë ditë dhe pas insistimit të madh nga ne pasi edhe anëtarët tjerë të familjes vetëm sa filluan t’i shohin simptomat. Ditën e pestë na i morën mostrat ku edhe anëtarët e tjerë dolën pozitiv”, tha ajo.
Ajo tregon se testin e kanë kryer në QKMF, shkruan Gazeta Sinjali.
“Testin e kryem te QKMF-ja. Kemi shkuar me dy vetura tonat për katër herë. Pas një procedure të thjesht në QKMF që na kanë marrë mostrat jemi kthyer në shtëpi ku jemi vet izoluar. Pos që jemi të izoluar në shtëpi, unë dhe vajza jemi të izoluar edhe në dhoma”, tha ajo.
Pas testimeve ajo thotë se ka rezultuar negative, ndërsa vajza e saj 2-vjeçare ka rezultuar pozitiv. Ajo thotë se rezulatet i ka mësuar nga interneti.
