Pas zyrtarizmit të koalicionit për bashkëqeverisje ndërmjet LDK-së, AAK-së dhe Listës Serbe, sipas burimeve të “Front Online”, partia e Fatmir Limajt Nisma, pritet t’i ketë dy ministri. Atë të Tregtisë si dhe Ministrinë e Punëve dhe Mirëqenies Sociale.

Siç bëjnë të ditura burimet e “Front Online”, edhe Fatmir Limaj pritet të jetë zëvendëskryeministër në qeverinë e udhëhequr nga LDK-ja në krye me Avdullah Hotin.

Ndërkaq, nga LDK-ja, zëvendëskryeministre do të jetë ministrja në detyrë Hykmete Bajrami, ministër i Bujqësisë pritet të emërohet deputeti nga Peja, Armend Zemaj. Ministër I Infrastrukturës, deputeti Arban Abrashi, Ministër I Punëve të Brendshme, Agim Veliu, ministër i Shëndetësisë infektologu Valbon Krasniqi, Vlora Dumoshi do të vazhdojë të udhëheq me ministrinë e Kulturës,  si dhe Anton Quni do të mbesë ministër I Forcës dhe Sigurisë së Kosovës.

Ndërkohë, sot në ora 13:00 pritet të takohen kandidati për kryeministër I LDK-së, Avdullah Hoti bashkë me kreun e Nisma-s, Fatmir Limajn.

Ndërkaq, gjatë dy ditëve të fundit janë zyrtarizuar koalicioni ndërmjet LDK-së, AAK-së dhe Listës Serbe.

Sipas marrëveshjes, zëvendëskryeministër i parë do të jetë Besnik Tahiri. Kurse ministritë që do të udhëhiqen nga AAK janë: Ministria e Punëve të Jashtme me ministren e propozuar Meliza Haradinaj-Stublla, Ministria e Drejtësisë me ministrin e propozuar Selim Selimi, Ministria e Zhvillimit Ekonomik me në krye Blerim Kuqin dhe Ministria e Arsimit me ministrin e propozuar, Ramë Likaj  /FrontOnline/