Presidenti Thaçi dhe kryeministri Hoti kanë mbajtur sot një takim, teksa pas të njëjtit janë deklaruar para mediave.

Kryeministri Hoti tha se ka informuar presidentin për takimet që ka pasur deri tash.

Duke folur për emërimin e Skender Hysenit në pozitën e koordinatorit për dialogun, ai tha se i njëjti flet në emër të kryeministrit dhe se synimi do të jetë që bisedimet të mos bijen asnjëherë në nivel teknik.

“E informova presidentin për takimet që kemi pasur deri tash. Sot do të raportoj edhe në Kuvend në detaje. E falënderoj presidentin për mirëkuptimin për emërimin e koordinatorin. Ai flet në emër timin dhe ka përvojë të madhe. Ne do të sigurohemi që dialogu në asnjë formë të mos rrëshqas në nivel teknik. Ne po mundohemi në maksimum që të koordinojmë veprimet me partnerët tanë”, tha ai.

“Për shkaqe të dialogut unë do t’i mbajë të gjithë palët të informuara”, tha në fund Hoti kur u pyet nga gazetarët për paralajmërimin e kreut të AAK-së, Ramush Haradinaj, se subjekti i tij mund të dalë nga koalicioni qeverisës.