Ish-deputeti i LDK’së, Gani Geci, ka treguar se për cfarë është pyetur gjatë intervistimit në Dhomat e Specializuar të Gjykatës Speciale në Hagë.
“Kam qëndruar 7 ditë në Hagë. Udhëtova nga Shkupi pasi nuk kishte mundësi nga Kosova. Pata probleme në kufi me Maqedoninë. A frikësohen ata nga unë nuk e di”, thotë ai.
“Prokuroria Speciale e Republikes Kosovës më mori në pyetje prej javës të kaluar deri dje. Katër ditë jam marrë në pyetje gjithsej. Është hera e parë që merrem në pyetje. Isha marrë në pyetje edhe në Prishtinë por kjo kishte dallime të shumta. Kanë qenë dy prokurorë. Njëri ka qenë anglez dhe tjetri amerikan. Kanë qenë shumë korrekt. Që në fillim më thanë që nuk je i detyruar të implikosh familjarët as vetën në vepër. Që në fillim isha si dëshmitar. Kjo nuk do të thotë se në Speciale mund të futesh si dëshmitar dhe më pas mund të dalësh si i dyshuar”, thotë ai. “Pyetjen e parë më kanë bërë për komunikatën 59. I kanë të gjitha ato që janë shkruar dhe kanë dalë në televizor që nga viti 1999. Janë shumë të informuar mirë. Më kanë pyetur për komunikatën 59. Më kanë pyetur edhe për Abedin Rexhën. Nuk kanë pasur asnjë dyshim në fillim nga ajo që është thënë dhe janë publikuar që nga viti 1999. Komunikata ka qenë jashtëzakonisht e rëndësishme pasi ajo lidhet me dy vrasje. Ata janë interesuar jashtë zakonisht shumë. Ata e kishin edhe deklaratën e Rexhep Selimit ku kishte thënë se përmendet komunikata 59 e kështu me radhë. Më pyetën edhe për reagimin që ishte botuar në gazetë. Enveri e kishte publikuar dhe ishte i frikësuar atë kohë. Enver Maloku e kishte informuar gjithë botën për atë që po ndodhte në Drenicë. Ai më vonë u vra. Të gjitha informatat ishin dhënë nga shtëpia jonë. Prej një telefoni. Ata kanë informata të jashtëzakonshme. I dinë të gjitha. Më kanë pyetur edhe për vrasjen e Adem Jasharit. Për të gjitha. Për marrëdhëniet e tij me bashkëluftëtarët“, shtoi tutje ai në T7.
