Anëtari i Këshillit të Përgjithshëm të LDK-së, Bajram Gecaj i është përgjigjur deputetit Fatmir Rexhepi, i cili të martën në Interaktiv të KTV-së tha se për përjashtimin e anëtarëve të saj nga strukturat e partisë, LDK-ja do ta paguajë çmimin në zgjedhje.

Përmes një postimi në Facebook ai i ka quajtur të papranueshme dhe irrituese këto deklarata.

Sipas tij, kritikat dhe zgjidhja e problemeve do të duhej të bëhej në parti dhe jo në studio televizive.

Demokracia në asnjë rast nuk nënkupton anarki. Vendi i kritikës dhe i zgjidhjes së problemeve e dallimeve janë trupat e partisë e jo studiot televizive”, ka thënë ai.

Gecaj ka shtuar se “partia nuk është pronë as e themeluesve dhe as a ardhjeve të reja, por shtëpia e përbashkët e bashkëmendimtarëve dhe bashkëveprimtarëve; stazhi në parti nuk guxon të keqpërdoret”.

Ai tutje ka deklaruar se nuk duhet luftuar njëri-tjetrin derisa sipas tij “armë e shtizat” duhet t’i drejtojnë kah kundërshtarët politikë.

“Dikush mund të mendoi se gabuam tash, e unë mund të mendoi se gabuam më herët; por kjo tani është e parëndësishme. Me rendësi është që ne të ecim para dhe të mësojmë nga gabimet tona, e jo të luftojmë njëri tjetrin si adoleshentë të papjekur; ‘armët e shtizat’ t’i drejtojmë kah kundërshtarët politik! Dele të zeza që ‘gabojnë rëndë’ janë ata të cilët ndahen nga turma”, ka thënë ai.

Rexhepi dje i ftuar në Interkativ ndër të tjera ka folur edhe për zhvillimet e fundit brenda kësaj partie. Ai ka thënë se përjashtimi i disa anëtarëve të kësaj partie ka qenë vendim i gabuar i kryetarit Isa Mustafa, derisa ka shtuar se çmimin e kësaj do ta paguajë në zgjedhje.