Bekim Jashari nderon heronjtë në Ditën e Çlirimit, thotë se Kosova nuk është aty ku deshtën ata që dhanë jetën

Lajme

Bekim Jashari nderon heronjtë në Ditën e Çlirimit, thotë se Kosova nuk është aty ku deshtën ata që dhanë jetën

FrontOnline

12 Qershor 2020

Komentet

Kryetari i Komunës së Skenderajt, Bekim Jashari, ka kujtuar 21-vjetorin e çlirimit të Kosovës.

Në një shkrim në rrjete sociale, Jashari, ka kujtuar familjarët e tij të rënë në luftën e fundit dhe të gjithë të rënët tjerë.

Jashari, ka hedhur kritika ndaj asaj që ka ndodhur paslufte, duke thënë se “fatkeqësisht ende jemi larg jetësimit të amanetit të heronjëve, dëshmorëve e luftëtarëve të Lirisë, për të pasur një shtet të qëndrueshëm, shoqëri të zhvilluar e mirëqenie sociale për të gjithë”.

Shkrimi i plotë:

Të dashur familjarë të dëshmorëve, invalid e veteran të Ushtrisë Çlirimtare të Kosovës,Të dashur qytetarë,

Sot në 21 vjetorin e çlirimit të Kosovës, kujtojmë e nderojmë të gjithë ushtarët, dëshmorët e martirët që ranë në altarin e lirisë për të mos vdekur kurrë. Janë ata që shkruajtën historinë e përjetshme, është vepra dhe heroizmi i tyre unik ai që vulosi të ardhmen e Kosovës.Sot Kujtojmë heroizmin e familjes Jashari, luftën e shenjtë çlirimtare të Komandantit Legjendar Adem Jashari e bashkëluftëtarëve të tij, kujtojmë masakrat mbi civilët në Qirez e Likoshan, Abri, Izbicë, Rezallë, Reçak, Studime, Dubravë, Krushë e Madhe, Has e masakra tjera mbi popullin e pafajshëm e liridashës shqiptar.Kujtojmë e nderojmë sakrificën e invalidëve të UÇK-së e viktimat civile të luftës sonë çlirimtare.
Sot po ashtu falënderojmë shtetet demokratike, mike të Kosovës për përkrahjen dhe ndihmën e dhënë në rrugën tonë të çlirimit nga okupatori serb.
21 vite pas, fatkeqësisht ende jemi larg jetësimit të amanetit të heronjëve, dëshmorëve e luftëtarëve të Lirisë, për të pasur një shtet të qëndrueshëm, shoqëri të zhvilluar e mirëqenie sociale për të gjithë.
Për të pasur një Kosovë të zhvilluar, ku mbizotëron rendi e ligji, arsimi cilësor, një rini e shëndoshë e të punësuar, një ekonomi të qëndrueshme e mirëqenie sociale për të gjithë, duhet të jemi të bashkuar, duke vënë në rend të parë interesin tonë shtetëror.Edhe sot, si në çdo ditë tjetër, kërkojmë që kriminelet serb të dalin para drejtësisë për krimet dhe gjenocidin e bërë si dhe të dihet fati i të zhdukurve tonë në luftën e fundit çlirimtare.Si Komunë e Skenderajt, shënimin e 18 qershorit- Ditës së Çlirimit të komunës sonë, për shkak të situatës emergjente do të shënojmë më ndryshe se vitet e kaluara.Ditën e Çlirimit të Skenderajt, do të nisim me nderime tek shtatorja e Komandantit Legjendar Adem Jashari në Skenderaj, për të vazhduar më pas me homazhe tek Kompleksi Memorial “Adem Jashari”, në Prekaz dhe tek Kompleksi i Dëshmorëve në Marinë.
Për këtë datë historike do të mbajmë Seancë Solemne të Kuvendit Komunal, në nderim të të rënëve për Liri.Në shenjë nderimi e falënderimi për kontributin dhe sakrificën sublime, në këtë datë historike do t’i vizitojmë familjet e dëshmorëve dhe do t’iu ndajmë mirënjohje.Të dashur qytetarë, urime 21 vjetori i Çlirimit të Kosovës!Lavdi të përjetshme të pavdekshmëve të rënë për Liri!

Të fundit