Presidenti turk Rexhep Tajip Erdogan akuzoi Greqinë për rrezikimin e sigurisë pasi njoftoi stërvitjet ushtarake dhe detare pranë vendit ku Turqia po bën shpimet në një zonë të diskutueshme të Mesdheut.
Sipas Euronews, në një fjalim të hënën, Erdogan tha se Greqia po “rrezikon sigurinë bregdetare dhe lundruese të të gjitha anijeve në rajon” dhe paralajmëroi se qëndrimi i saj ndaj ligjit ndërkombëtar e kishte futur Greqinë “në një kaos nga i cili nuk mund të dalë”.
Ndryshe, po sipas Euronews, autoritetet kanë thënë se forca detare dhe ajrore e Greqisë do të zhvillojnë ushtrime ushtarake duke filluar nga e marta.
Ndërkohë, Gjermania po rrit përpjekjet diplomatike për të parandaluar tensionet midis dy rivalëve rajonalë që të përshkallëzohen më tej, duke dërguar të martën ministrin e saj të jashtëm në Athinë dhe Ankara.
Në këtë drejtim, ministri i Jashtëm gjerman Heiko Maas do të përpiqet të “rigjallërojë” bisedimet që synojnë de-përshkallëzimin e tensioneve midis dy fqinjëve.
“Nga këndvështrimi ynë, dialogu i drejtpërdrejtë dhe hapat nga të dy palët për të deeskaluar situatën janë të nevojshme për të gjetur një zgjidhje dhe për të ulur tensionet”, citohet të ketë thënë zëdhënësi i Ministrisë së Jashtme gjermane, Christofer Burger, para gazetarëve në Berlin.
“Ne kemi një shqetësim të madh se këto tensione… mund të kenë pasoja edhe më të rënda”.
Siç shkruan më tej Euronews, Gjermania, e cila mban presidencën e radhës të BE, është në mesin e vendeve të BE që konsiderohen të gatshme të vendosin sanksione ndaj Turqisë.
Ministrat e jashtëm të BE pritet të diskutojnë mbi krizën në Mesdheun lindor në një takim joformal në Berlin këtë javë.
Euronews më tej kujton faktin se Qeveria turke kundërshton pretendimin e Greqisë për të drejtat ekskluzive në ujërat ku anija kërkimore Oruc Reis e Turqisë tani po bën kërkimet për naftë dhe gaz.
Turqia thotë se Oruc Reis duhet të vazhdojë punën deri të enjten.
Ndërkohë Greqia ka kërkuar vazhdimisht tërheqjen e saj, madje duke i dërguar anijet e saj luftarake në zonë dhe i vuri në gatishmëri forcat e saj të armatosura.
Për më tepër, disa stërvitje tre-ditore të Greqisë do të fillojnë në juglindje të ishullit Grek të Kretës, thanë zyrtarët në Athinë.
Dhe tensionet midis dy anëtarëve të NATO-s mbi të drejtat e Detit Mesdhe kanë pasur jehonë në të gjithë Evropën.
Përkundër të gjithave, Erdogan u zotua të hënën që të mos hiqte dorë nga kërkimi i energjisë në Mesdheun lindor.
“Turqia nuk do të bëjë asnjë hap më të vogël për sa i përket operacioneve të Orus Reis dhe as (në lidhje me) flotën tonë (detare)”, tha ai. “Përkundrazi, Turqia do të veprojë me më shumë vendosmëri në lidhje me mbrojtjen e të drejtave të saj, dhe ligjeve në rajon”.
