Presidenti i Shteteve të Bashkuara, Donald Trump, ka filluar të flasë mirë për maskat, ndonëse deri vonë asnjëherë nuk ishte parë në publik duke e vendosur një të tillë.
Përmes një postimi në Twitter, ai ka thënë se përdorimi i maskës po vlerësohet si akti patriotik nga shumë njerëz dhe ka pretenduar se askush nuk është më patriot se vetë ai, duke shtuar se është president i parapëlqyer i amerikanëve.
“Ne jemi të bashkuar në përpjekjen tonë për ta mposhtur virusin e padukshëm kinez dhe shumë njerëz thonë se është patriotike të vendoset maska, kur nuk mund të mbani distancë sociale. Askush nuk është më patriotik se unë, presidenti juaj i parapëlqyer”, ka shkruar kreu i Shtëpisë së Bardhë.
Për më tepër, presidenti njoftoi se do t’i rifillojë konferencat ditore për koronavirusin, të cilat i kishte ndërprerë befasisht në prill pasi ishte kritikuar gjerësisht kur kishte bërë thirrje për përdorim të zbardhuesit si mënyrë e mundshme për luftimin e koronavirusit.
Shtetet e Bashkuara janë në vendin e parë në botë për numrin e rasteve dhe viktimave të koronavirusit. Deri më tani, atje janë regjistruar më shumë se 3.8 milionë të infektuar dhe rreth 140 mijë të vdekur.
