Situata me pandeminë Covid-19 në Komunën e Gjilanit është përmirësuar.
Kështu bën të ditur Komiteti për menaxhimin e emergjencave në këtë komunë.
Kreu i Gjilanit, Lutfi Haziri, tha se nuk ka asnjë pacient që po trajtohet në klinikë, ndërsa 21 pacientë janë në vetizolim.
“Kjo është arritur falë angazhimit të institucioneve komunale, regjionale, përfshirë edhe Këshillin e Bashkësisë Islame dhe komunitetet tjera fetare. Nga 51 rastet e infeksionit, dy kanë ndërruar jetë, 21 janë në vetizolim, ndërkaq të tjerët janë shëruar plotësisht”, ka thënë Haziri.
Sipas njoftimit të Komunës, Haziri beson që rezultatet për testet e sotme do të dalin sipas pritjeve, në mënyrë që infeksioni të ulet në pikën zero.
Haziri, gjithashtu, ka kërkuar nga të gjithë qytetarët që të vazhdojnë ta respektojnë orarin e qarkullimit dhe masat kundër përhapjes së koronavirusit.
