Të hënën Asociacioni i komunave të Kosovës, do të takohet me kryeministrin Hoti dhe tre ministra, ku do të diskutohet rreth kritereve dhe formulës së shpërndarjes së 10 milionë eurove në komuna, fillimi i procesit mësimor, si dhe situata epidemiologjike.
Kështu ka bërë të ditur për KosovaPress, drejtori i Asociacionit të Komunave të Kosovës, Sazan Ibrahimi, i cili shpreson se po në këtë takim do të lirohen edhe disa nga masat që janë ndërmarr më herët.
Ibrahimi: Shpresojmë se disa masa që janë ndërmarr më herët të lirohen
“Në këtë takim do të diskutohen disa tema kryesore do të jetë fillimi i procesit mësimor 2020/21, gjithashtu do të diskutohet edhe sa i përket kritereve dhe formulës së shpërndarjes së 10 milion eurove në komunat e Kosovës si përkrahje në luftën ndaj parandalimit të përhapjes së covid-19. Do të diskutojmë edhe për situatën epidemiologjike në Republikën Kosovës, ku shpresojmë se disa masa që janë ndërmarr më herët të lirohen”, thotë ai.
Sa i përket shpërndarjes së 10 milionë eurove në komuna, Ibrahimi thotë se këto të fundit hyn në atë vijë buxhetore ku të gjitha mjetet që komunat i kanë shpenzuar në luftimin e përhapjes së covid-19 do t’i rikthehen.
Ibrahimi: AKK ka kërkuar nga niveli qendror që t’ia mundësojë komunave rialokimin e mjeteve buxhetore
“Asociacioni i komunave të Kosovës ka kërkuar nga niveli qendror që t’ia mundësoj komunave rialokimin e mjeteve buxhetore në mënyrë që ata t’i shfrytëzojnë për parandalimin e covid-19. Kemi gjetur një gjuhë të përbashkët dhe kemi hapur një nën kod së bashku me ministren e financave, ku komunave i është lejuar të shpenzojnë mjete financiare për antiCovid dhe të gjitha ato mjete dhe ato fatura t’i adresojnë në këtë nën kod dhe pastaj niveli qendrorë të bëjë kthimin e mjeteve financiare komunave”, deklaron ai.
Në takimin e 24 Gushtit, do të diskutohet edhe fillimi i procesit mësimor 2020/21, për çka Ibrahimi u shpreh i bindur se komunat janë të gatshme.
Ibrahimi:Komunat janë të gatshme sa i përket fillimit të procesit mësimor
“Komunat janë të gatshme sa i përket fillimit të procesit mësimorë të këtij viti, ndarjen në grupe të caktuara apo në çfarë ‘skenarjo’ do të përdorën, do të jetë vendim individual i secilës komunë në bazë të rrethanave në teren”, thotë ai.
Ibrahimi vlerëson se, që nga fillimi i pandemisë e deri në këto momente që po flasim, komunat janë treguar të suksesshme në menaxhimin e situatës epidemiologjike.
