Zgjedhjet e parapara lokale për vitin e ardhshëm rrezikojnë të mos mbahen, si shkak i shkurtimeve buxhetore. Komisioni Qendror i Zgjedhjeve ka paraqitur në Ministrinë e Financave planifikimin buxhetor për organizimin e këtyre zgjedhjeve, e që është mbi 7 milionë euro. Ndërsa, ky institucion ka ofruar shumën për rreth 3 milionë euro më pak.
Kështu u tha në mbledhjen e sotme të KQZ-së, ku anëtari i Lidhjes Demokratike të Kosovës, Ilir Hamiti tha se projeksioni buxhetor i zvogëluar, rrezikon mbajtjen e zgjedhjeve lokale të parapara për 2021.
“Është shqetësuese projeksioni i buxhetit për vitin 2021 është zvogëluar nën masën, e cila rrezikon mbajtjen e zgjedhjeve. Në projeksionin e pjesës të kodit për zgjedhje është marrë shuma me një krahasim me zgjedhjet nacionale. E dihet që zgjedhjet nacionale janë më të ulëta. Total projeksioni ka rënë për 3 milionë. Unë shoh që duhet të bëjmë arsyetime të plota, sepse në buxhet rrezikohet mbajtja e zgjedhjeve dhe nuk ka mundësi për mbajtjen e tyre. Sa e kam parë, dhe kemi bërë krahasim me zgjedhjet tjera”, tha Hamiti.
Ndërkohë që KQZ- ka planifikuar buxhet mbi 7 milionë euro për zgjedhjet lokale 2021, për të dyja raundet, ndërsa Ministria e Financave ka planifikuar mbi pesë milionë. Kryetarja e Komisionit Qendror të Zgjedhjeve, Valdete Daka tha se do t’i drejtohen qeverisë sa i përket shkurtimit të buxhetit.
“Me siguri qeverisë do t’i drejtohemi me një shkresë, do të kërkojmë një lloj shpjegimi se a është gabim, apo ky shkurtim është bërë qëllimisht”, tha ajo.
Anëtari i Komisionit Qendror të Zgjedhjeve, Sami Hamiti ka folur edhe për shpenzimet buxhetore në gjashtë mujorin e parë të këtij viti. Sipas tij, projeksionet buxhetore duhet të jenë më të ulëta, meqë shpenzimet komunale nuk janë të mëdha.
“Te mallrat dhe shërbimet, dhe te shpenzimet komunale ka një shpenzim shumë të ulët. Është i ulët për shkak se realisht shtyrja e zgjedhjeve që lidhet me zgjedhjet e Podujevës, sepse e dimë që buxheti fillestar ka qenë 6 milionë e 176 mijë, janë shtuar me vendim të qeverisë edhe 393 mijë për zgjedhjet në Podujevë, gjithsej është 6 milionë e 569 mijë buxheti. Janë shpenzuar 2 milionë e 683 mijë, që i bie nën nivelin 40 për qind shpenzime të buxhetit të gjashtëmujorit të parë. Trendi i shpenzimeve për mallra dhe shërbime është 16 për qind, që është i ulët. Dhe në shpenzime komunale është 19,7. Kemi pasur një sugjerim shumë të mirë nga auditori që në projeksionet tjera buxhetore të kemi kujdes te planifikimi i shpenzimeve komunale, pasi shpenzimi është më i ulët se që e planifikojmë”, ka theksuar ai.
Komisioni Qendror i Zgjedhjeve ka shqyrtuar edhe raportin e auditorit të brendshëm. Sylejman Gashi nga Auditori i Brendshëm tha se bazë të këtij raporti nga viti 2014, 2017 e 2019, ka pasur rritje të stafit jo-permanent, ku edhe janë keqpërdorur afro 160 mijë euro.
“159 mijë euro është shuma e shpenzuar nga stafi jo permanent pa autorizim të KQZ-së. Për këtë çështje duhet një aprovim, mirëpo edhe një arsye e madhe, sepse po vazhdohet angazhimi i tyre, edhe një autorizim i KQZ-së. Kjo shumë e mjeteve është pa lejen e zotit të shtëpisë. Pjesa e dytë ka të bëjë me pasojat financiare të rinumërimit të fletëvotime”, u shpreh ai.
Në lidhje me këtë kryetarja e KQZ-së tha se ky është keqpërdorim, dhe u zotua se do të identifikohen ata që kanë tejkaluar autorizimet.
“Unë do të kërkoj që të identifikohen departamentet, të cilat i kanë tejkaluar autorizimet. Të gjitha, dhe kjo tashmë e tejkalon shkeljet e detyrës së punës, se kjo është keqpërdorim, sepse dikush ka përfituar që i ka marrë këto paga, dhe kanë qëndruar pa lejen e KQZ-së. KQZ nuk ka qenë e njoftuar se ky staf jo permanent po qëndron më tepër se që është nevojshme dhe po paguhet. Dhe këtu i kemi diku 160 mijë euro, duke mos përfshirë 208 mijë, se aty e kemi një arsyetim, pasi janë angazhuar për rinumërim”, ka deklaruar Daka.
Në mbledhjen e KQZ-së është miratuar edhe rregulla zgjedhore për fletëvotimet dhe broshurat.
