Të ardhurat nga puna jashtë vendit kaluan vlerën e 200 milionë eurove në tremujorin e parë të këtij viti. Kjo shifër përfshin dërgesat e emigrantëve, por edhe të ardhurat e shtetasve shqiptarë nga puna sezonale ose në distancë jashtë vendit. Sipas Bankës së Shqipërisë për 3-mujorin e parë të këtij këto të ardhura kishin vlerën e 202 milionë eurove, ndërsa të njëjtën periudhë të një viti më parë kishin qenë lehtësisht më të larta, në shumën e 204 milionë eurove.

Vitin e kaluar këto të ardhura kaluan pragun e 1 miliardë eurove dhe kishin një vlerë të përafërt me investimet e huaja direkte.

Vala e dytë e emigracionit shqiptar, pas vitit 2010, ka bërë që remitancat t’i kthehen një rritjeje të lehtë, vit pas viti. Dërgesat e emigrantëve janë një burim tejet i rëndësishëm për mbrojtjen e shtresave më të varfra.

Një studim i Bankës së Shqipërisë, në bashkëpunim me Bankën Botërore, ka treguar se remitancat janë burim të ardhurash për rreth 26% të familjeve shqiptare. Dërgesat nga jashtë përbëjnë 90% të të ardhurave të familjeve marrëse, çka tregon se rreth një e katërta e familjeve në Shqipëri varen pothuajse ekskluzivisht prej tyre.

Megjithatë, veç remitancave, në vitet e fundit një peshë në rritje po fitojnë të ardhurat nga puna jashtë vendit e individëve rezidentë në Shqipëri. Veç punësimit sezonal, kjo lidhet sidomos me punën në distancë ose ofrimin e shërbimeve për kompani të huaja. Një shembull tipik janë shërbimet call-center ose shërbimet e teknologjisë së informacionit, që kompanitë e huaja i kontraktojnë në vende me kosto më të lirë të punës, siç është Shqipëria.

Kriza e shkaktuar nga epidemia e Covid -19 pritet që të prekë këtë vit edhe të ardhurat nga jashtë dhe kryesisht remitancat. I gjithë rajoni i Ballkanit Perëndimor pritet të pësojë edhe rënie të dërgesave të emigrantëve, që, sipas Bankës Botërore pritet të jetë sa rreth 0.5% e PBB-së.