Në zgjedhjet e përgjithshme parlamentare në Serbi, shqiptarët e Luginës së Preshevës të cilët për herë të parë u unifikuan në një listë të përbashkët, kanë siguruar dy ulëse në parlamentin serb, derisa po shpresojnë për të tretën.

Derisa kjo u konsiderua si arritje e madhe, Kryetari i PDSH-së në Luginën e Preshevës, Ragmi Mustafa, partia e të cilit nuk mori pjesë në zgjedhje hedh dyshime për amplifikim të votave në kutitë e votimit.

Mustafa i cili thotë se pjesëmarrja e shqiptarëve në votime ishte shumë e ulët, rreth 5-6%, dyshon se vota e qytetarëve preshevarë është keqpërdorur, shkruan Reporteri.

“Ne kemi montuar pjesëmarrjen në votime të shqiptarëve dhe ka qenë shumë e vogël, deri diku në 5-6%. Gjithsesi, në kutitë e votimit janë amplifikuar, duke dalë disa qindra herë më shumë vota. T’i vidhet qytetarit të lirë shqiptar vota kështu, kjo gjë ndodh vetëm në vendet afro-aziatike ose vendet e lindjet, dhe në Serbi. Po në Serbi situata nuk është më e mirë, pasi edhe opozita ka bojkotuar zgjedhjet dhe partia e Vuçiç ka dalë e vetme dhe komisionerët e tij ia kanë dalë t’i mbushin kutitë në mënyrë marramendëse”, u shpreh ai.

Ai ndër të tjera thotë se përkundër se shqiptarët edhe më parë janë përfaqësuar me një deputet në parlamentin serb, nuk është bërë ndonjë arritje e madhe.

“Ne kemi pasur deputet shqiptar dhe ka qenë për shumë vite, por nuk është arritur asnjë lëvizje për shqiptarët, pasi nuk e kanë akoma të drejtën për të përdorur simbolin kombëtar. Nëse kjo gjë nuk është arritur për 30 vite, ku është ideja që do të arrihet këtë mandat? Nëse duhet zgjedhje për Luginën e Preshevës, të bëhen për parlamentin e Shqipërisë, që të kenë deputetë në këtë parlament dhe atë të Kosovës. Ashtu sikurse kanë nisur serbët deputetë serbë nga territori i Kosovës në parlamentin e Serbisë. Nëse serbe u njihet kjo e drejtë, pse të mos u njihet shqiptarëve kjo e drejtës? Vetëm Serbia di të ngrejë zërin në Këshillin e Sigurimit? Këtë duhet të bëjë edhe qeveria shqiptare dhe ajo e Kosovës, në mënyrë që shqiptarët të thonë hallet e tyre aty ku dëgjon, jo në veshin e shurdhët të Beogradit”, tha Mustafa në një intervistë për oranews.