Në Komunën e Gjakovës sonte janë paraqitur shtatë raste të reja me Covid-19.
Drejtori i Spitalit të Gjakovës, Hilmi Shala ka thënë se pesë nga këta pacientë janë raste kontakti ndërsa dy prej tyre kanë qenë të shtrirë në spitalin e Gjakovës në Repartin e Infektivit.
“Në Spitalin e Gjakovës janë të shtrirë shtatë pacientë të konfirmuar me COVID-19”, tha ai në Rtv Dukagjini.
Shala thotë se katër personel shëndetësorë nga Gjakova janë të prekur me koronavirus.
“Një internistë, një gjinekolog, një infektolog dhe një punëtorë i administratës janë të prekur me COVID-19. Mjekët janë duke u trajtuar në shtëpitë e tyre ndërsa punëtori i administratës është duke u trajtuar në Klinikën Infektive”.
Drejtori i Spitalit të Gjakovës thotë se trendi ditëve të fundit nuk është i mirë pasi ka një rritje të personave nga Gjakova të prekur me koronavirus, përcjell Telegrafi.
“Kemi mbi 40 raste aktive në komunën tonë edhe pse numrin e saktë nuk e dimë pasi nuk kemi të dhëna të plota për numrin e të shëruarve”, deklaroi ndër të tjera Hilmi Shala.
