Ka më shumë se gjashtë muaj që nga koha kur në Kosovë u konfirmuan rastet e para të të infektuarve me COVID-19.

Që nga atëherë, Qeveria e Kosovës ndërmori masa të shumta në mënyrë që të parandalojë përhapjen e këtij virusi.

Lidhur me këtë, së fundi në Kuvendin e Kosovës u votua edhe Ligji për parandalimin dhe luftimin e pandemisë COVID-19, i cili ishte propozuar nga një grup prej gjashtë deputetësh.

Me këtë ligj autorizohen institucionet kompetente që të shikojnë nga afër se sa po respektohen të gjitha nenet që përmban ky ligj.

Të kontaktuar nga IndeksOnline, Policia e Kosovës kanë bërë të ditur se vetëm brenda një jave janë shqiptuar mbi 5 mijë gjoba, për mos-respektim të ligjit anti-COVID.

“Nëse flasim për angazhimet e policisë që kur ka filluar zbatimi i Ligjit për parandalimin dhe luftimin e COVID-19, për rreth një javë, janë shqiptuar mbi 5 000 gjoba”, thuhet në përgjigjen e PK-së.

Qytetarë të shumtë gjatë këtyre ditëve kanë shprehur pakënaqësi për mënyrën e shpërndarjes së gjobave, derisa pati shumë paqartësi edhe për vendosjen apo jo të maskës gjatë vozitjes.

Duhet përkujtuar që deri në votim të këtij ligji, ishin vetëm inspektorët ata të cilët mund të gjobisnin qytetarët për mos-respektim të masave të ndërmarra nga institucionet përkatëse, por që nga votimi i këtij ligji janë edhe pjesëtarët e Policisë së Kosovës të cilët shkruajnë gjoba për të njëjtën problematikë.

Deri më sot në Kosovë me COVID-19 janë infektuar 13 mijë e 713 persona ndërsa kanë humbur jetën 539 qytetarë të cilët s’arritën t’i bënin ballë infeksionit nga ky virus.

Përpos kësaj për fat të mirë nga COVID-19 janë shëruar 9 mijë e 923 persona.

Pavarësisht gjithë kësaj, numri i të infektuarve nga dita në ditë vazhdon të jetë mjaftë i lartë, e rreziku për përhapje të këtij virusi është ende afër të gjithëve.