Ish-drejtuesi i Këshillit Kombëtar të Shqiptarëve në Shtetet e Bashkuara të Amerikës, Martin Vulaj, ka thënë se i përzgjedhuri special i Shtëpisë së Bardhë për të ndërmjetësuar në dialogun Kosovë-Serbi, Richard Grenell, është zhgënjyer nga vendimi i palës kosovare për të mos shkuar në Ëashnigton.
Në një lidhje direkte nga SHBA në Klan Kosova, ai ka thënë se ky anulim takimi rrezikon që Shtetet e Bashkuara të Amerikës të heqin dorë nga përpjekja për të gjetur zgjidhje për problemin ndërmjet Kosovës dhe Serbisë.
“Në këto rrjedhat e fundit ka shumë paqartësi, por është e qartë se nuk është rastësi. Pa dashur të hyj në spekulime, por pasojat janë shumë të rënda, jo vetëm për procesin që kemi qenë në mes, por edhe për kërcënimin që e paraqet për Kosovën”.
Vulaj ka treguar se ka zhvilluar një bisedë me Grenell dhe se ky i fundit ka dashur që pala kosovare të shkojë për bisedime në SHBA.
“Grenell ka thënë se ai ka qenë në koordinim me këshilltarë të sigurimit kombëtar të Francës dhe Gjermanisë – Amerika dëshiron të krijojë hapësirë për marrëveshje ekonomike [të krijojë një klimë më të mirë ekonomike, të punësohen njerëzit dhe të krijohen kushte për të hyrë në një fazë politike në të cilën përfshihet edhe Europa]. Pa Europën nuk ka integrim në Bashkim Europian dhe investime të tjera që janë të nevojshme”.
Ai tregon se Grenell nuk e ka pritur mirë lajmin se Gjykata Speciale ka ngritur aktakuzë ndaj Presidentit Hashim Thaçi dhe kryetarit të PDK-së, Kadri Veselit.
“Normal që nuk është pritur mirë; megjithëse e mbështesin procesin e drejtësisë. Nuk është pritur mirë koha kur është shfaqur kjo gjë sidomos duke pasur parasysh natyrën e këtij lajmi. Ishte pak e çuditshme me pas një lajm të tillë që ka pasoja të drejtpërdrejta në dialogun Kosovë-Serbi”.
