269 persona kanë vdekur nga Coronavirusi që prej fillimit të pandemisë në Kosovë e deri më tani, raporton Front Online.

Këto janë të dhënat që jep Instituti Kombëtar i Shëndetësisë Publike.

Nga 269 vdekjet e regjistruara në gjithë vendin, 39 prej tyre janë nga Prizreni e 14 nga Vitia.

Shifrat dyshifrore i kanë konfirmuar për Front Online, zyrtarë nga të dy këto komuna.

Përgjysmë më pak të vdekur janë regjistruar në dy komunat e tjera, Obiliq dhe Kamenicë.

Nga 8 pacientë kanë vdekur si në njërën ashtu edhe në tjetrën nga COVID-19.

Informatën për numrin e vdekjeve në Kamenicë e konfirmoi për Front Online, zëdhënësja e kësaj komune, Margarita Rashiti. E atë për komunën e Obiliqit, Vlora Kabashi, që udhëheq me drejtorinë e Shëndetësisë.

Një vdekje më pak (7) se në këto dy komuna është regjistruar në komunën e Fushë Kosovës.
Këtë e ka konfirmuar për Front Online zëdhënësi i komunës, Ali Topalli.

Megjithatë, Instituti në pothuajse çdo njoftim të tijin potencon se viktimat, pos infektimit me COVID-19, kanë pasur sëmundje të tjera shoqëruese.

Me këtë formë nuk është pajtuar një mjek shqiptar nga Gjermania, i cili i propozoi IKSHPK-së ta largojë pjesën e fjalisë ku thuhet ‘të vdekurit kanë pasur edhe sëmundje të tjera shoqëruese’./Front Online/