Kryetari i LDK-së, Isa Mustafa ka folur për  videon që është shpërndarë në rrjete sociale ku është sajuar varrimi i tij.

Ai tha së kur motra e tij e ka parë këtë video gati ishte alivanosur.

“Motra ime e pa një video që njerëzit kanë shkuar tek varri im e kanë mbajtur fjalime aty e gati i ka rënë të fikët. Ajo u ka thënë të tjerëve pse nuk më tregoni që ka vdekur vëllai im. Jemi në një kohë kur njerëzit po vdesin dhe po varrosen po u bërë e madhe shumë. Kam kontaktuar me policinë dhe me sektorin për krimet kibernetike, ata po merren me të”, tha Mustafa në RTK.

Lideri i LDK-së nuk e fajësoi askënd për videon që qarkulloi nëpër rrjetet sociale.

“S’mund t’ja lë askujt. Pata kërcënime nga militantët e Vetëvendosjes. Por s’dua të futem në akuza. Janë pamje brutale dhe s’ kanë të bëjnë me logjikën e njeriut. Ai që e bëri këtë duhet të jetë i degjeneruar edhe nga pikëpamja njerëzore”, deklaroi Mustafa.