Ministrja në detyrë e Drejtësisë, Albulena Haxhiu, tha se ishte në interesin e të dërguarit të presidentit amerikan Donald Trump, Richard Grenell, që të arrihet një marrëveshje e shpejtë Kosovë-Serbi.
Por, sipas saj, shpejtësia do të ishte në dëm të Kosovës, e cila është viktimë e krimeve të Serbisë dhe se ky borxh duhet të dialogohet fillimisht.
“SHBA-të për ne janë aleatë dhe për këtë s’ka diskutim. Por, kur SHBA-ja është para zgjedhjeve edhe Grenellit i intereson që të arrijë një sukses. Një marrëveshje e shpejtë padyshim që ndikon edhe në suksesin e tij”, tha ajo në Klan Kosova.
“Ne nuk pranojmë të shkojmë dhe të nënshkruajmë marrëveshje me presidentin që tha se duhet hequr qafe Serbia. Presidenti duhet t’i heqë duart nga politika e jashtme. Aktgjykimi i Gjykatës Kushtetues ia dha të drejtën për ta udhëhequr dialogun”.
“Serbia ka borxh ndaj Kosovës sepse ka bërë gjenocid, masakra, përdhunime. S’mund të ecim pa u rikthyer për këto çështje, s’mund ta konsiderojmë Serbinë si shtet normal dhe të shkojmë në SHBA dhe të firmosim marrëveshje”.
Haxhiu tha se ishin ata që e penguan një marrëveshje të keqe për Kosovën të gatuar nga presidenti serb dhe ai kosovar.
“Përpjekja e vazhdueshme e Thaçit dhe Vuçiqit, fatmirësisht, ishte e pasuksesshme falë rezistencës sonë të vazhdueshme. Asociacioni dhe një marrëveshje me territore janë të dëmshme për Kosovën”.
Nënkryetarja e Vetëvendosjes tha se edhe kjo temë ishte një ndër arsyet e rrëzimit të Qeverisë Kurti, ndërsa edhe si një shkaktar tjetër për rënien nga pushteti ishte droja e atyre partive që kanë dorë në degradimin e vendit dhe që kanë krijuar pasuri në kurriz të varfër. Sipas Haxhiut ata patën frikë nga reformat në drejtësi.
“I kemi përveshur mëngët edhe për hartimin e Ligjit për Konfiskimin e Pasurisë së Paligjshme. Përmes këtij ligji synohet që nëse prokurori vlerëson se Albulena Haxhiu ka pasuri në shpërputhje me pagën. Nëse kjo ndodh atëherë konfiskohet pasuria”.
