Ministrja e Punëve të Jashtme dhe Diasporë e Kosovës, Meliza Haradina-Stublla, gjatë qëndrimit në ShBA ka vizituar Shoqatën “Vatra”, e cila me dekada ka qenë shtëpia e shqiptarëve në Amerikë.
Ajo ka thëë se misioni i tyre i pandalshëm dhe guximi për të qëndruar drejtë, është shtegu që duhet të ndjekin edhe sot.
“Shoqata “Vatra” ndër dekada ka qenë shtëpi e shqiptarëve në Amerikë, dhe ka punuar fort për të na lidhur përjetësisht me mikun tonë, ShBA-të. Nder dhe emocion i veçantë të pritem brenda këtyre mureve ku jeton historia e figurave të lavdishme të kombit. Misioni i tyre i pandalshëm edhe kur kohërat ishin kundër nesh dhe guximi për të qëndruar drejtë, është shtegu që duhet të ndjekim edhe sot”, ka thënë Haradinaj-Stublla.
Ajo ka falënderuar gjithë shqiptarët në Amerikë për punën e bërë që ta mbajnë miqësinë e Kosovës me ShBA-në.
“Me të falat e ngrohta nga atdheu, falënderova nga zemra kryesinë e shoqatës “Vatra” në Nju Jork, dhe përfaqësuesit e “Vatrës” që erdhën nga Michigan, për të gjithë punën e palodhshme që bëjnë për të fuqizuar rolin shqiptar në ShBA, duke na dhënë siguri për miqësinë e përhershme me Amerikën. Historia na ka treguar se vetëm të bashkuar do dalim fitimtarë, dhe kështu do të qëndrojme para çdo udhëkryqi, bashkë dhe të fortë”, ka theksuar ajo.
