Lajme

Demaçi i paharrueshëm për Thaçin: Adem Demaçi, emri dhe mbiemri i ndërgjegjes kombëtare

Demaçi i paharrueshëm për Thaçin: Adem Demaçi, emri dhe mbiemri i ndërgjegjes kombëtare
20:29 | 26 Korrik 2020

Veprimtari i çështjes kombëtare, Adem Demaçi, është figura e radhës që ka zënë vend të rëndësishem tek rubrika “Njerëz të paharrueshëm” të presidentit, Hashim Thaçi.

Thaçi në dy vjetorin e vdekjes së Demaçit, sjellë në kujtesë, emrin dhe figurën e Demaçit.

Ai shkruan se ai ishte i burgosur politik që me ndërgjegje të lartë, qëndrueshmëri dhe konsistencë të përhershme nuk lëvizi asnjë moment nga ideali i tij jetësor.

Ky është postimi i plotë i Thaçit:

ADEM DEMAÇI është emri dhe mbiemri i ndërgjegjes kombëtare dhe politike të Kosovës së gjysmës së dytë të shekullit njëzet. Është emri i njeriut që sakrifikoi për së gjalli talentin e tij, rininë dhe burrërinë, duke ngritur zërin kundër pushtimit të Kosovës nga Jugosllavia, përkatësisht nga shteti i Serbisë.
Me burgosjet e njëpasnjëshme, Adem Demaçi u shndërrua në simbol të vetëdijes sonë kombëtare, duke u bërë frymëzim për shumë gjenerata në rrugë drejt lirisë dhe pavarësisë së Kosovës.
Adem Demaçi ishte i burgosur politik që me ndërgjegje të lartë, qëndrueshmëri dhe konsistencë të përhershme nuk lëvizi asnjë moment nga ideali i tij jetësor.
Emri i tij personifikon vlerat më të mira të shpirtit liridashës të kombit që i përkiste, por edhe ato të vlerave universale të kulturës, tolerancës dhe dashurisë ndaj njerëzimit.
Jam krenar që pata fatin të punoj dhe koordinoj shumë veprime dhe qëndrime politike me Adem Demaçin si përfaqësues i lartë politik i Ushtrisë Çlirimtare të Kosovës në vitet 1998 – 1999.
Një komb mund të jetë i vogël numerikisht, por është i madh cilësisht kur nxjerr nga gjiri i tij një njeri të përmasave evropiane dhe botërore.
Emri i Adem Demaçit është i përjetshëm, ashtu si ideali dhe ëndrra e lirisë, ashtu si Kosova e të gjitha gjeneratave që ishin, janë dhe do të vijnë. HTH

Prince Coffee House tani edhe në Vjenë të Austrisë

Të tjera