Lajme

Avokati i Speciales: Pas intervistimit pritet të konfirmohet ose të hidhet poshtë aktakuza ndaj presidentit Thaçi

Avokati i Speciales: Pas intervistimit pritet të konfirmohet ose të hidhet poshtë aktakuza ndaj presidentit Thaçi
13:32 | 16 Korrik 2020

Sot bëhen katër ditë kur ka nisur intervistimi i presidenti të vendit, Hashim Thaçi, në Gjykatën Speciale.

Ftesa për intervistim i erdh presidentit pak javë pas ngritjes së aktakuzës nga Prokurori i Specializuar, pranë kësaj Gjykate, e ku sipas saj, Thaçi, akuzohet për 100 vrasje të paligjshme, përfshirë viktima të identifikuara shqiptare, serbë dhe romë të Kosovës dhe kundërshtarë politikë.

Lidhur me stërzgjatjen e intervistimit të presidentit, avokati i akredituar kosovar nga Specialja, Tahir Rrecaj, ka thënë për Front Online, se është një procedurë e zakonshme.

Sipas tij, zgjatja e intervistimit varet nga çështjet që i ngrit prokurori dhe nga përgjigjet që jep presidenti për ato çështje.

“Intervistimi i presidentit Thaçi është duke u bërë për disa ditë. Nuk bëhet fjalë për katër ditë të plota, por për katër gjysmë dite, sepse zakonisht Gjykata Speciale intervistat i fillon nga ora 13:00 pasdite deri në orën 18:00 në mbrëmje.  Varësisht nga interesimi i Prokurorit për sqarimin e shumë çështjeve, në pyetjet që parashtrohen nga prokurori për z. Thaçi, si për pozitën e tij gjatë luftës ashtu edhe pas luftës dhe përgjigjeve të presidentit zgjat edhe intervistimi”, ka thënë Rrecaj për Front Online.

Avokati i Speciales poashtu ka folur edhe rreth termit propozim-aktakuzë që është përdorur gjatë këtij procesi.

Ai theksoi se kjo aktakuzë është ngritur nga Prokurori i Dhomave të Specializuara pranë Gjykatës Speciale në Hagë, dhe e njëjta pritet të konfirmohet apo të hidhet poshtë, pas intervistimit të presidentit.

“Dua të sqaroj se ndaj presidentit Thaçi nuk ka propozim-aktakuzë, dhe këtë nuk e njeh si term Ligji. Fjala është për një aktakuzë që është dërguar në Gjykatë, në kompetencë të gjyqtarit të procedurës paraprake. Ajo është e pakonfirmuar dhe ky intervistim mund të ketë ndikim që gjyqtari të merr një vendim të drejtë për konfirmimin ose hedhjen e aktakuzës. Unë besoj në pafajësinë  e z. Thaçi”, ka thënë ai për Front Online.

Më 24 prill 2020, Zyra e Prokurorit të Specializuar (ZPS) u paraqiti Dhomave të Specializuara të Kosovës (DHSK) një aktakuzë me dhjetë pika për shqyrtim prej Gjykatës, ku presidenti i Kosovës, Hashim Thaçi, kryetari i Partisë Demokratike të Kosovës, Kadri Veseli dhe të tjerë akuzohen për një sërë krimesh kundër njerëzimit dhe krime lufte ndër të cilat, vrasje e paligjshme, zhdukje e detyruar e personave, përndjekje dhe tortura.

Në këtë aktakuzë e cila u bë publike me 24 qershor, u theksuar se kjo aktakuzë është vetëm një padi penale e  cila sipas prokurorit është rezultat i një hetimi të gjatë dhe se pas shqyrtimit të aktakuzës nga një  gjykatës i procedurës paraprake i DHSK-së vendoset nëse do  t’i konfirmojë apo jo akuzat./Front Online/

 

Comodita nis 35 kontejnerë me dyshekë për në SHBA

Të tjera