Tenderi i shpallur në vlerë prej 120 mijë euro nga Komuna e Istogut për punimin e shtatores së presidentit të ndjerë të Kosovës, Ibrahim Rugova, në vendlindjen e tij (Istog), po përcillet me ankesa për parregullsi dhe favorizime të një operatori të caktuar ekonomik, raporton portali “Front Online”.
Në seancën e së mërkurës (sot) të Organit Shqyrtues të Prokurimit (OSHP), përfaqësuesi i kompanisë private “P.M.N”, Zenun Tolaj, ka deklaruar se në dosjen e tenderit kanë hasur në shkelje të Ligjit të Prokurimit Publik, pasi që, siç ka thënë ai, këtë e ka konstatuar edhe eksperti shqyrtues i OSHP-së, Ilaz Papaj, i cili ka propozuar që ankesa të pranohet dhe lënda të kthehet në ri-vlerësim.
Në anën tjetër, Zize Bujupaj nga Komuna e Istogut, ka thënë se nuk pajtohen me arsyetimin e ekspertit shqyrtues, pasi që, sipas saj, konkursi i projektimit dallon nga procedurat tjera të prokurimit.
Ajo ka shtuar se ky aktivitet i prokurimit është vlerësuar nga një juri profesionale dhe vendimi i kësaj të fundit është që kompania “Albana Muriqi BI” të shpallet fituese.
Ndërsa eksperti shqyrtues Ilaz Papaj ka thënë se pretendimet e operatorit ankues qëndrojnë.
“Operatori i shpallur fitues nuk i ka dorëzuar 3 kontrata dhe referenca, siç është kërkuar në dosje të tenderit. Kontratat dhe referencat e operatorit ekonomik, Albana Muriqi BI nuk janë të operatorit ekonomik, por janë të individit Gëzim Muriqi. Poashtu nuk janë dorëzuar deklaratat në vlerë prej 150 mijë euro,por operatori fitues ka dorëzuar një deklaratë për vitin 2018 në vlerë prej 144 mijë euro, ndërsa për vitet 2017, 2019 nuk ka pasur kontrata”, ka thënë Papaj, duke shtuar se për këto shkelje Komuna e Istogur ka thënë se këto janë devijime të vogla, por, sipas tij, për këto devijime janë shpallur të papërgjegjshëm dy operatorë ekonomik, raporton “Front Online”.
Vendimi i Panelit Shqyrtues për këtë aktivitet Prokurimit do të merret në ditët në vijim, deri sa portali “Front Online” do t’u mbaj të informuar në vazhdimësi për rrjedhën e këtij procesi të prokurimit.
