Askush nuk e di nëse do të ketë apo jo zgjedhje këtë vit.

Por, në rast se ndodhin, dikush,  veçse e ka ndarë mendjen se kë do ta votojë në to.

Madje jo veç ai.

“Gjithqysh unë për veti jo po me krejt familjen Albinit. Që 7 vjet unë jom me Vetëvendosje”, u shpreh një qytetar.

Ndonëse preferon më shumë partinë e Kurtit sesa të tjerat, një qytetar, akoma nuk është bindur plotësisht për ta votuar atë.

Për këtë ka një arsye.

“Edhe ata i kanë do këmbëngulësi që në politikë nuk kanë vend. Duhet njëfarë butësie edhe aty”, theksoi qytetari për Front Online.

Një tjetrit më shumë po i pëlqen Avdullah Hoti.

Ai është aq i kënaqur me punët që ky po bën në qeverinë aktuale, sa që thotë se edhe në zgjedhjet e ardhshme pa fije dyshimi do ta votonte atë para kandidatëve tjerë.

“Avdullah Hotin. Asnjë njeri nuk i afrohet ngat prej politikaneve. I len krejt fjetun”, thotë një qytetar tjetër.

MT: Vjosa dhe Albini do të marrin mbi 50 % të votave në zgjedhje

Edhe njohësit e rrethanave politike janë të ndarë në dysh.

Profesori universitar Mazllum Baraliu është i bindur se Albin Kuriti dhe Vjosa Osmani nëse bashkojnë forcat do të marrin mbi 50 % te votave në zgjedhje.

“Ajo dhe Albini padyshim që do të kenë 50 % e votave. Kjo është dëshmuar në 100 mënyra dhe raste. Ka nevojë për reformim dhe për rotacion. Ka nevojë për figura të reja dhe intelektuale”, u shpreh ai.

Ndryshe mendon Shkëlzen Maliqi.

“Me realist është parashikimi që Osmani t’i sjellë VV-së rreth 25 mijë vota maksimum, çka nuk ia siguron Kurtit as 40% sepse as partitë konkurrente nuk do të rrinë pa kundërveprime në krijimin e koalicioneve për të rritur votën”, tregoi ai.

Zgjedhjet me rregull duhet të mbaheshin pas 3 vjetëve me 2023. Por ato do të mund t`i përshpejtonte inicimi i suksesshëm i ndonjë mocioni mosbesimi.

Një të tillë e ka nisur Vetëvendosja, por që nuk po arrin të marrë përkrahjen e vazhdueshme.