Ministrja e Jashtme e Kosovës, Meliza Haradinaj-Stublla ka pasur sot një bisedë telefonike me homologun e saj turk, Mevlüt Çavuşoğlu.

Për këtë, kryediplomatja kosovare ka njoftuar me anë të një postimi në Facebook, teksa ka thënë se temë e këtij diskutimi ishin edhe njohjet për shtetin e Kosovës,.

“Theksova se ne si shtet i ri, jemi të përkushtuar që njohjet tona ndërkombëtare të shtohen dhe të fuqizohet subjektiviteti ynë ndërkombëtar”, ka shkruar ajo.

Sidoqoftë, Haradinaj nuk ka treguar nëse homologu turk ia ka përmendur asaj çështjen e vendosjes së ambasadës së Kosovës në Jeruzalem, pasë parasysh kundërshtitë e shtetit turk për njohjen e Jeruzalemit si territor izraelit.

Postimi i plotë në Facebook i Meliza Haradinajt:

Zhvillova një bisedë të gjatë telefonike me Ministrin e Jashtëm të Turqisë, Mevlüt Çavuşoğlu.

Shpreha mirënjohje ndaj shtetit të Turqisë për përkrahjen në vazhdimësi të Republikës së Kosovës, në rrafshin bilateral dhe atë të forcimit të subjektivitetit ndërkombëtar të Kosovës.

Theksova se ne si shtet i ri, jemi të përkushtuar që njohjet tona ndërkombëtare të shtohen dhe të fuqizohet subjektiviteti ynë ndërkombëtar. Do të vazhdojmë të bashkëpunojmë ngushtë me miqtë tanë me të cilët kemi të ndërtuar ura të qëndrueshme bashkëpunimi dhe raporte të pathyeshme. Në po këtë kontekst, rikonfirmova se marrëdhënia e ngushtë bashkëpunuese me Turqinë është e shkëlqyeshme, dhe avancimi i interesave tona të përbashkëta do të bëhet në drejtim të forcimit të ndërsjellë.