Deputeti i Aleancës për Ardhmërinë e Kosovës, Bekë Berisha, ka kërkuar përgjegjësi nga ministri i Punëve të Brendshme, Agim Veliu, pas hyrjes së xhandarmërisë serbe në territor të Kosovës ditë më parë, raporton Front Online.

“Kur duan të zgjidhen ministrat, ‘lavër-vllaçë’ bëjnë krejt Kosovën për të marrë detyrën. Kur e marrin detyrën nuk e kryejnë. A po mundohet me e fshehë përgjegjësinë ai? Në Komisionin për Siguri nuk na vjen Ministri i Punëve të Brendshme, e as drejtori i policisë nuk guxon të vijë”, ka thënë ai.

Hyrjen e xhandarmërisë serbe në territor të Kosovës, Ganimete Musliu, deputete nga rradhët e PDK-së e ka vlerësuar si kërcënim direkt për qytetarët, teksa ka thënë se më shqetësues e sheh faktin që Qeveria e Kosovës dhe institucionet e sigurisë nuk e kanë prishur komoditetin.
Ajo ka pasur kritika për kryeministrin Avdullah Hoti, i cili sipas saj, nuk e ka kontaktuar Këshillin e Sigurisë.

Edhe deputeti i LVV-së, Artan Abrashi ka akuzuar kryeministrin, Avdullah Hoti për mos ndërmarrjen e asnjë veprimi pas këtij incidenti.
Sipas tij, hyrja e personave të uniformuar është një nga incidentet më të rënda që nga viti 2012./Front Online