Një 96-vjeçar nga Italia është kthyer në studentin më të vjetër të vendit. Xhuzepe Paterno, në rini, si pasojë e varfërisë nuk mundi dot që të niste studimet.
Ndërsa para pak ditëve u diplomua në shoqërinë e miqve të tij student, -që janë 70 vite më të ri se sa ai- dhe familjarëve. I moshuari thotë se e ka ushqyer gjithmonë dashurinë për librat, edhe pse në jetë ka përjetuar dy luftërat botërore, si edhe depresionin e madh të viteve të pasluftës, e cila sipas tij bëri që ai të ndalte shkollën.
“Thashë me vete o tani o kurrë. Në vitin 2017 u regjistrova në universitet. E kuptoja që ishte pak vonë për një diplomë tre vjeçare, por kjo shërbeu si një test ndaj vetvetes. Isha shumë i ndrojtur në fillim. Më mundonte ideja se si do të silleshin studentët e tjerë me mua, profesorët gjithashtu. Dy vitet e para ishin disi më të lehta, sepse leksionet i ndiqja në auditore, ndërsa ky vit si pasojë e pandemisë, mësimin e realizuam online. Ishte pak e vështirë kjo praktikë, sidomos për moshën time”, tha Xhuzepe.
