Ministri i Shëndetësisë, Armend Zemaj ka themeluar sot Bordin këshillëdhënës për COVID-19, në krye me mikrobiologun Lul Raka. Ai ka bërë me dije se ky bord do të ftoj për takim katër ish-ministrat e fundit të shëndetësisë për të dhënë kontribut me përvojën e tyre në menaxhimin e pandemisë.

Një prej ish minsitrave që do të ftohet për takim është edhe bashkëpartiaku i Zemajt, Imet Rrahmani.

Ai ka treguar nëse do t’i përgjigjet kësaj ftese.

Rrahmani ka thënë se është i gatshëm që të ndihmoj në çfarëdo iniciative që kontribon në menaxhimin e situatës së krijuar nga pandemia, dersia ka treguar se ka kontakte të rregullta me Ministrin e Shëndetësisë.

“Unë personalisht jam i gatshëm të ndihmoj çfardo iniciative që kontribon në menagjimin e rrethanave në shëndetësi dhe sidomos nē situatēn e krijuar nga pandemia COVID-19. Përndryshe unë jam takuar me Ministrin Zemaj në zyrën e tij dhe kemi kontakte të rregullta”, ka thënë Rrahmani për Express.

Ndryshe, Bordi do të mbledhë ekspertizën e nevojshme për krizën aktuale të COVID-19 me qëllim që t’i ofrojë Ministrisë këshilla të shpejta, të bazuara në dëshmi shkencore për përgjigjen shëndetësore ndaj COVID-19, raporton Express.

Në krye të këtij bordi do të jetë mikrobiologu Lul Raka, derisa anëtarë të tjerë të këtij bordi janë Isuf Dedushaj, Muharrem Bajrami, Salih Ahmeti, Rukije Mehmeti, Isme Humolli, Xhavit Rexhaj, Xhavit Gashi, Pashk Buzhala, Besim Kodra.

“Bordi do të formulojë masat e reagimit që duhet të adresohen në përgjigje të pandemisë Covid-19; do të identifikojë dhe zbus mangësitë, masat e marra ose që duhen ndërmarrë për të përmirësuar dhe menaxhuar përhapjen e Covid-19, përfshirë edhe menaxhimin dhe trajtimin klinik të rasteve”, ka thënë Zemaj.

Ai ka bërë me dije se Bordi do të ftojë në takime katër ish-ministrat e fundit të Shëndetësisë për të kontribuar së bashku me përvojën e tyre në menaxhimin e pandemisë Covid-19.

“Po ashtu, Bordi do të këshillojë edhe për prioritizimin e kujdesit shëndetësor dhe masat mbështetëse, do të rekomandoj politika për adresimin dhe zbutjen e pasojave afatmesme dhe afatgjata të Covid-19. Bordi do të ftojë në takime katër ish-ministrat e fundit të Shëndetësisë: Prof. dr. Ferid Agani, Dr. Imet Rrahmani, z. Uran Ismaili dhe dr. Arben Vitia, për të kontribuar së bashku me përvojën e tyre në menaxhimin e pandemisë Covid-19”, ka deklaruar Zemaj