Ujësjellësi i Prishtinës ka kërkuar nga qytetarët që të bëjnë pagesat për shërbimet e ujit dhe kanalizimit sipas tyre për dy arsye, mos lejimin e grumbullimit të borxhit dhe për shkak të ruajtjes së qëndrueshmërisë financiare të kompanisë.
“Ne kërkojmë nga ju që keni mundësi, të bëni pagesa për shërbimet e ujit dhe kanalizimit për dy arsye, mos lejimin e grumbullimit të borxhit tuaj dhe për shkak të ruajtjes së qëndrueshmërisë financiare të kompanisë që ndërlidhet me shërbimet e ofruara, si prodhim, furnizim dhe mirëmbajtje”, thuhet në njoftim.
Sipas njoftimit, thirrja për pagesë vlen për konsumatorët Prishtinës, Fushë Kosovës, Obiliqit, Shtimes, Lipjanit, Drenasit, Graçanicës dhe Podujevës.
“KRU Prishtina” ka apeluar që gjatë pagesave të respektohen rekomandimet e IKSHPK-së.
“Nëse vendosni të realizoni pagesë në pikat e arkëtimit, ju lutem respektoni rekomandimet e Ministrisë së Shëndetësisë për mbajtjen e distancës sociale dhe masat tjera mbrojtëse. Përveç pikave të arkëtimit të KRU”Prishtina” sh.a., pagesa mund të bëni edhe përmes Postës, bankave komerciale dhe institucioneve mikrofinanciare”.
Ujësjellësi i Prishtinës gjatë muajve të pandemisë ka hasur probleme me pagesat e konsumatorëve dhe ka apeluar kohë pas kohë që qytetarët t’i kryejnë detyrimet financiare ndaj kompanisë.
