Deputeti i Aleancës për Ardhmërinë e Kosovës, Gazmend Abrashi, në seancën e Kuvendit ka bërë të ditur se AAK-ja do të mbështesë pesë marrëveshjet ndërkombëtare.
Ai ka ftuar edhe partitë e tjera, sidomos ato në opozitë që të mbështesin këto marrëveshje pasi PDK doli kundër.
“Ne si grup parlamentar do të mbështesim marrëveshjet ndërkombëtare”, ka thënë Abrashi.
Kujtojmë, se në rendin e ditës së seancës të Kuvendit deputetët po shqyrtojnë projektligjet që kanë të bëjnë me ratifikimin e pesë marrëveshjeve ndërkombëtare.
Projektligji për ratifikimin e Marrëveshjes për financim ndërmjet Kosovës dhe Asociacionit Ndërkombëtar për Zhvillim për Projektin e Fuqizimit të Sektorit Financiar, Projektligji për ratifikimin e Marrëveshjes për Hua ndërmjet Kosovës dhe BERZH-it për Projektin e Zhvillimit të Ujërave të Zeza në Gjilan, Projektligji për ratifikimin e Marrëveshjes për Financimin e Projektit për Kadastër të Patundshmërisë dhe Infrastrukturë Gjeohapësinore ndërmjet Kosovës dhe Asociacionit Ndërkombëtar për Zhvillim.
Në rend dite për shqyrtim janë edhe Projektligji për ratifikimin e Marrëveshjes ndërmjet BE-së dhe Kosovës mbi pjesëmarrjen e vendit tonë në Programin e Bashkimit “Dogana 2020” dhe Projektligji për ratifikimin e Marrëveshjes BE-Kosovë mbi pjesëmarrjen e Kosovës në Programin e BE-së “Fiskalis 2020”.
Një pikë e nxehtë debati pritet të jetë ajo e interpelancës së kryeministrit Hoti në seancën e re plenare në ora 11:00, dhe raportimi para deputetëve lidhur me dialogun Kosovë-Serbi, me ç’rast do të ketë debat të gjerë parlamentar.
Para këtij debati, në rend dite janë formimi i Komisionit Ad-Hoc për përzgjedhjen e kandidatëve për tre anëtarë të Komisionit të Pavarur për Media, formimi i Komisionit ad-hoc për përzgjedhjen e kandidatëve për 7 anëtarë të Bordit të RTK-së dhe propozimi i GP Nisma për zëvendësimin e deputetëve në komisionet parlamentare.
https://www.facebook.com/FrontOnlineMedia/videos/314968459669576/
