Sontë në Mitrovicë janë regjistruar edhe dy raste të reja me coronavirus.
Nënkryetari i Mitrovicës Faruk Mujka në RTV Dukagjini ka thënë se është lajm i mirë që lista e të dyshuarve për COVID-19 në Mitrovicë është duke u ngushtuar.
“Sot janë dërguar për testim 23 mostra ndërsa vetëm dy kanë rezultuar pozitiv në COVID-19. Të dy rastet janë familjarë dhe raste kontakti të rastit të parë. Normal që nuk është lajm i mirë që kemi edhe dy raste por së paku është lajm i mirë që lista po ngushtohet”, tha ai.
Nënkryetari i Mitrovicës thotë se të prekurit janë të moshës së re dhe se nuk kanë pasur asnjë simptomë të dukshme.
“Vetëm testet laboratorike e kanë zbuluar se janë të prekur nga COVID-19, pasi nuk kanë pasur simptoma”.
Mujka ka komentuar edhe zbutjen e masave nga ana e qeverisë.
“Dalja masive e qytetarëve nuk ka qenë sinjal i mirë. Shpresojë se nga nesër do të jenë më të vëmendshëm dhe të ruajnë shëndetin e tyre dhe të familjarëve”, tha ndër të tjera Faruk Mujka.
