Komuna e Ferizajt është njëra ndër Komunat më të prekura nga Coronavirusi në vend, ku numri i përgjithshëm i të prekurve në këtë qytet ka shkuar në 98.
Bekim Ademi, drejtor i Shëndetësisë dhe Mirëqenies Sociale në këtë Komunë, ka deklaruar për “Front Online” se pas rasteve të reja me Covid-19, komuna e Ferizajt është duke e bërë listën e kontakteve.
“ Gjendja është e qetë, pas daljes së rasteve të reja me Covid 19. Tani jemi duke bërë gati listen e kontakteve, pra personat e infektuar me kënd janë takuar, pastaj thirren këta persona dhe fillimisht, vetëizolohen e pastaj Instituti i Shëndetit publik merr mostrat per testim”, tha ai për Front Online.
Ademi tha se kanë kontaktuar me familjet dhe se shtabi i ka ndihmuar me pako ushqimore dhe higjenike.
“Jemi në kontakte të vazhdueshme me këto familje, dhe përcjelljen e gjendjes shëndetësore të tyre. Furnizimet me material shëndetësor momentalisht janë te mira, sepse kemi institucionet shëndetësore që janë furnizuar edhe nga Komuna jone me këto materiale”, potencoi Ademi për Front Online.
Sipas tij, ndihma drejtuar nga Ministria e Shëndetësisë kanë filluar të vijnë.
“Ndihmat nga Ministria kanë filluar të vijnë, por jo në sasinë e duhur”, përfundoi ai.
Në Kosovë deri më tani kanë vdekur 22 persona nga Coronavirusi, 763 janë të prekur dhe 166 të shëruar.
/Front Online/
