Instituti Kombëtar i Shëndetësisë Publike (IKSHPK) ka njoftuar se në Kosovë aktualisht po përballen me virusin Korona 3,815 persona të konfirmuar pozitiv.

Shumica prej tyre po trajtohen në kushte të vetizolimit shtëpiak, ndërsa një numër i konsiderueshëm i rasteve më serioze po marrin trajtim spitalor gjithandej vendit.

Shërbimi Spitalor dhe Klinik Universitar i Kosovës njoftoi të mërkurën pasdite se në klinikat e Qendrës Klinike Universitare dhe në spitalet rajonale të Kosovës po trajtohen gjithsej 432 persona të konfirmuar me COVID-19.

Sipas njoftimit, 237 pacientë janë të shtrirë në klinikat e Qendrës Klinike Universitare dhe 195 në spitalet rajonale.

“Prej tyre, 14 pacientë janë në gjendje më të rënduar dhe janë të vendosur në respiratorë. Ndërkaq, 35 pacientë po trajtohen me makinën për frymëmarrje me maskë, të njohur me shkurtesën CPAP, ndërkaq 389 po trajtohen me oksigjeno-terapi”, thuhet në njoftimin e SHSKUK-së.

Numri i rasteve fatale dhe i rasteve të reja të të infektuarve është rritur ndjeshëm gjatë ditëve të fundit. Vetëm dje u raportua për 15 të vdekur brenda 24 orëve ndërsa numër i përafërt i viktimave janC konfirmuar edhe gjatë ditëve të kaluara.

Që prej 13 marsit deri më 5 gusht, sipas të dhënave të Institutit Kombëtar të Shëndetësisë Publike, Kosova ka regjistruar 9,492 raste me koronavirus. Prej tyre, 284 pacientë kanë vdekur dhe 5,346 të tjerë janë shëruar.