Shamima Begun, që në vitin 2015 si 15-vjeçare iku nga Londra për t’iu bashkuar Shtetit Islamik në Siri, mund të kthehet në Britani për të luftuar kundër vendimit për marrjen e shtetësisë së saj Britanike, ka vendosur Gjykata e Apelit, shkruan BBC-ja të enjten.
Begun tash 20-vjeçare, ishte njëra nga tri vajzat adoleshente të cilat ikën në Siri për t’iu bashkuar ISIS-it.
Shtetësia e saj u anulua nga Ministria e Brendshme e Britanisë për shkak rrezikut për siguri, pasi që u gjet në një kamp refugjatësh në Siri në vitin 2019.
Apeli vlerësoi se ajo nuk kishte pasur gjykim të drejtë, meqë nuk ka qenë në gjendje të mbrohet nga kampi në Siri.
Ky vendim do të thotë se Qeveria tani duhet të gjejë mënyra për të mundësuar që ajo, e cila aktualisht gjendet në një kamp në veri të Sirisë, të paraqitet para gjykatës në Londër pavarësisht se vazhdimisht ka thënë se nuk do ta ndihmojë në kthimin e saj nga Siria.
Avokati i saj Daniel Furner tha: “Begum nuk ka pasur asnjëherë mundësi që të japë anën e saj të tregimit. Ajo nuk ka frikë të përballet më drejtësinë në Britani. Por t’i hiqet shtetësia pa mundësinë që ta pastrojë emrin, nuk është drejtësi, është e kundërta”.
Begum iku nga Londra Lindore për Siri në vitin 2015, së bashku më dy shoqe të shkollës.
Brenda disa ditëve, ajo kishte kaluar kufirin e Turqisë dhe kishte arritur te qendra e ISIS-it në Raqqa të Sirisë, ku u martua me një rekrut danez të konvertuar në mysliman. Ata u bënë me tre fëmijë, por që të tre kanë vdekur.
